Saıda Qalyqova mádenıet salasyndaǵy memlekettik stıpendııaǵa ıe boldy

ASTANA. QazAqparat - Kózi kórmese de álem jurtshylyǵyn pıanınoda erkin bilikti mýzykant retinde ózine tanyta bilgen Saıda Qalyqova QR Tuńǵysh Prezıdenti - Elbasynyń mádenıet salasyndaǵy memlekettik stıpendııasyna ıe boldy, dep habarlaıdy QazAqparat tilshisi.

Bala kezinen mýzykaǵa qushtarlyǵy zor Saıda  taǵdyrdyń basqa salǵan qıyndyqtaryna esh moıyǵan emes. Kóz janarynan aıyrylsa da notany júregimen jattap, «Jańbyrdan keıin» dep atalatyn alǵashqy shyǵarmasyn 15 jasynda jazdy. Osy kompozıtsııasy arqyly jańbyrdan keıingi tabıǵattyń ǵajaıyp kórinisin sheber jetkize bildi. Mektepti de, mýzykalyq kolledjdi de úzdik bitirdi. Ulttyq óner ýnıversıtetinde bilim alyp, «Bolashaq» baǵdarlamasy arqyly Italııanyń Lýıdjı Kerýbını atyndaǵy konservatorııada oqydy. Italııanyń konservatorııasyn da Saıda úzdik bitirdi. Bethoven men Debıýssı boıynsha eki birdeı ǵylymı jumysty ıtalıan tilinde qorǵap, magıstratýrany «Laude» belgisimen aıaqtady.

Osy ýaqytqa deıin Saıda Qazaqstanda ǵana emes, Reseı men Italııada ondaǵan kontsert berdi. Halyqaralyq baıqaýlarǵa qatysty. Qaıyrymdylyq sharalaryna da jıi atsalysyp otyrady. Mýzykant óz repertýaryn únemi jańartyp otyrýǵa tyrysady. Sırek kezdesetin shyǵarmalardy izdeıdi. Onyń ózgege uqsamaıtyn kontserttik baǵdarlamasyn tyńdarmandar da jıi baıqap júr.

Aıta keterligi, Saıda «Qazaqstannyń 100 jańa esimine» endi. Sonyń arqasynda Qazaqstan Prezıdenti Nursultan Nazarbaevpen kezdesip, Elbasynyń izgi tilegin estidi. 

«Rahmet, Saıda! Osy jolmen júre ber. Sen qansha jasqa ónege bolasyń. Adamnyń múmkindiginiń sheksiz ekenin kórsetesiń. «Baqyttymyn» dediń, baqytty bol! Uzaq ǵumyr tileımin! Áli talaı shyǵarmalar jazasyń. Qýantasyń bizdi...», - degen tilegin bildirgen edi Memleket basshysy mýzykant qyzǵa.