Sahnanyń kıesin sezingen janmyn - Qazaqstannyń halyq ártisi Kúlásh Sákıeva

Abaı kóshesindegi aýǵan soǵysy ardagerlerine arnalǵan eskertkish tusynda apaıdyń jibergen qyzyn kútip turmyn. Kún salqyn, qara sýyq. Bir kezde jas qyz júgirip kelip, Kúlásh apaıdyń úıine ertip apardy. Esikti qyz ashqanda apaı asúıden beri keldi de qol alysyp, amandyq surasqannan keıin tórge shyǵyp, sháı ishtik, áńgime óner tóńireginde órbidi. Bul Qazaqstannyń halyq ártisi Kúlásh Syrymbetqyzy Sákıevanyń úıi edi.

Kúlásh apaı «syrly aıaqtyń syry ketse de syny ketpeıdi» degendeı, ajarly jan eken. Ár sózinen ishki jan-dúnıesiniń qýaty, ómirge, ónerge qushtarlyǵy baıqalady.

Men sháı iship bolǵannan keıin dıktofonymdy alyp, sahnanyń has sheberin sózge tarttym. Áńgime qaz-qalpynda qaǵazǵa túsirildi.

- Kúlásh apa, siz jaıly biz Qazaq radıosy arqyly birer jyl buryn jaqsy bir habar uıymdastyrǵan edik. Ol joly altyn qorymyzdaǵy siz oryndaǵan tamasha ánder oryndaldy. Sol ánderdiń kóbin siz el aýzynan jazyp alyp tyńdaýshyǵa jetkizdińiz. Mátinin óńdeý barysynda qansha ánniń ǵumyry uzardy?

- Men qazaqtyń halyq ánin teatrmen gastrolde júrgende jınadym. Ándi úırengennen keıin mátini basqasha jazǵym keldi. Árıne, ánniń yńǵaıyna qaraı. Qazaqtyń kúldirgi ánderi bar. Ózimniń júrek qalaýym boıynsha osy laıyqty-aý dep jóndegen kezderim boldy. «Jetiaral jerim-aı» áni negizi Zaısannyń áni. Osy ánge sóz jazdym. «Qos jeńgeı sylqym-aı» degen Aqsýat jaǵynyń áni. Oǵan da sóz jazdym. Radıokomıtettiń altyn qoryna 1955 jyldan bastap án jazdym. Ol kezderi men Joǵarǵy Keńestiń depýtaty bolatynmyn. Sessııaǵa barǵan saıyn eki-úsh ánnen jazyp, «Altyn qorǵa» ótkizip otyrdym.

Almaty oblysy Eńbekshiqazaq aýdanynyń teatrynda Rahıla Kólbaeva degen garmonshy, ánshi «Aýlyń seniń irgeli» ánin alǵash maǵan úıretken. Bul ándi eń alǵash úntaspaǵa men jazǵam, keıin meniń oryndaýymda elge keńinen tarap ketti.

- Qazaq radıosynyń altyn qorynda Elýbaı Ómirzaqovtyń oryndaýynda birneshe halyq áni bar. Kóbisiniń mátinin qaıta jazǵan aqıyq aqyn Isa Baızaqov edi ǵoı. Odan keıin halyq ánine ár berip, qulpyrtyp jetkizgen siz be dep otyrmyn.

Siz jetpis jyldan astam teatrda eńbek ettińiz. Ózińizdiń somdaǵan rolderińizde qandaı án oryndadyńyz? Qaı rol sátti shyqty?

-Qazaqstannyń halyq ártisi Báıten Omarov bizde rejısser boldy. Ol kisi maǵan Maıranyń rolin senip tapsyrdy. Bul rol meniń dańqymdy asyrdy, dárejemdi kóterdi. Júregimde saqtalǵan án - Maıra beınesin somdaǵandaǵy Maıra Ýálıqyzynyń «Maıra» áni. Maıranyń obrazyn ashý úshin Báıtenmen aqyldasa otyryp, halyqtyń «Ahaý arman», Birjannyń «Jalǵyz arsha» ánderin qostyq.

Biz «Maıra» spektaklin Almatydaǵy Qazaqtyń Muhtar Áýezov atyndaǵy drama teatryna qoıýǵa aparǵanda úlken tabysqa jettik. Osy Maıra roliniń arqasynda Qazaqstannyń halyq ártisi ataǵyn jáne «Qurmet belgisi» ordenin aldym.

- Áli de oınalmaǵan rolińiz bar ma? Ómir boıy alǵa qoıǵan maqsatyńyzǵa jete aldyńyz ba? Osy jaıly aıta otyrsańyz!

- Men Qazaqstannyń halyq ártisi, belgili rejısser Asqar Toqpanovtyń alǵashqy shákirtteriniń birimin. Men teatr ýchılışesinde oqydym, menen keıin bul oqý ornyna Bıken Rımova men Sholpan Jandarbekova kelip tústi. Asqar óz kezinde mereıtoıyna shaqyrý qaǵazyn jibergende: «Meniń alǵashqy qarlyǵashym» dep erekshe baǵalap jazǵan edi. Teatr ýchılışesin men jaqsy bitirip shyqtym. Eń alǵashqy rolim Shıllerdiń «Zulymdyq pen mahabbat» spektaklindegi Lýıza roli bolatyn. Sahnadaǵy baǵymdy ashqan Maıra roli boldy,onyń arasynda úlkendi-kishili úsh júzge jýyq rolderdi somdappyn.

Jalpy adam balasynyń armany taýsylmaıdy ǵoı. Keýdede shybyn jan bolǵannan keıin sahnada júrsem eken dep oılaısyń. Jaqynda ǵana Muhtar Áýezovtyń «Qarakózinde» Mórjannyń ájesiniń rolin oınadym.

80 jyldyq mereıtoıymda «Kelinder kóterilisi» spektaklinde oınadym. Osy jasqa kelsem de kúndiz-túni oınaǵan rolderimniń mátini esime túsedi. Bar oıym, teatr búgin ne qoıyp jatyr eken? Tań atpaı qolym telefon tutqasyna júgirip turǵany. Telefon shalyp: «Keshe qandaı spektakl ótti, halyq jınaldy ma?» - dep árkez surap jatqanym. Men aqtyq demim bitkenshe osy ónermen bolatynyma senimdimin. Áli de oınamaǵan rolderim barshylyq.

-Siz úlkenderden úırendińiz. Ózińizdiń de shákirtińiz boldy. Ustazdan shákirt ozǵan kezder bolatyn shyǵar?

-Aqyl suraǵan jastarǵa bilgenimdi aıamaımyn. Bolmasa jas akterlerdiń jetpeı jatqan jerleri bolsa, kórermen retinde solarǵa aqylymdy aıtamyn. Biz qansha jyl sahnada júrdik, ómirden úlgi aldyq, sony jastarǵa úıretýge mindettimiz ǵoı.

-Aqanseriniń «Aqsaýsaq» ániniń yrǵaǵyna spektakl barysynda óz janyńyzdan óleń qosypsyz. Ol oı qaı kezde keldi?

-Beken Imahanov Aqandy oınady. Sol kezde Aqanǵa seri jigit Aqtoqtynyń syıyn ákeledi. Ol syılyq bas kıim. Aqan áshekeıli bas kıimdi qarap otyrady da «mynaý kimniń qolynan shyqqan?-deıdi. Sonda Aqannyń serileri - Án erkesi Aqsaýsaq ta, qyz erkesi Aqtoqty emes pe?-deıdi. Osy sózdi estigennen keıin Aqannyń «Aqsaýsaq» degen áni esime tústi. Soǵan men mynandaı sóz jazdym.

Tolyqsyp týǵan aıdaı Aqsaýsaǵym,

Oılasam ózińdi men ot bop jandym,

Aqsaýsaq, burań bel,

Saǵynsań sáýlem munda kel.

Joldaǵan bar armanym ánge qosyp,

Bir saǵan baqyt tilep júrgen janmyn,

Aqsaýsaq burań bel, izdeseń sáýlem munda kel.

Aqsaýsaq tolqyp aıtar ánim sensiń,

Aqsaýsaq aıaýly erke janym sensiń,

Aqsaýsaq burań bel,

Saǵyndym sáýlem jaqyn kel.

Arýym aınalaıyn bul jalǵanda,

Aldymnan shyǵar appaq tańym sensiń,

Aqsaýsaq burań bel,

Janyma jaqyn, jaqyn kel...

- Burynǵynyń adamdary aýyldy jerge barǵanda spektaklden keıin kontsert qoıady. Ony Kúlásh, Qanabek jaıly jazǵan kitaptardan kóp oqydyq. Sizder ne isteýshi edińizder?

- Ol kezde dalany kúrep tastap, bıdaıdyń arasyna spektakl qoıamyz. Odan keıin bir jarym saǵat kontsert qoıamyz.

Men Jambyl teatrynda on eki jyl eńbek ettim. Ol jaqta sekseýil jaǵady ǵoı, juqa kóılekpen dalada halyqtyń kóńilin kóterý úshin rolderimizdi oınaımyz. Soǵys kezinde jylap otyrǵan eldiń kóńilin kóteremiz.

Úsh aılyq Aıgúlimdi kóterip, seksen shaqyrym jaıaý júrip, óner kórsetken kezderimiz boldy. Qolym talsa basqa ártister kezekpe-kezek kóteredi. Esek jekken arbamyzda sahna dekaratsııasy, kıim-keshegimiz bolady. Sonda aldymyzdan shyqqan Jambyl oblysynyń basshysy Elibaı Edilbaev degen kisi bizdi aıap: «Aınalaıyndar, jaqyn qaldy, soǵys bitedi, bul qıyndyqtan da kózderiń ashylyp, jaqsy kúnge jetesińder, shydańdar!»- dep sharshap kele jatqan bizge rýh beretin.

- Sizdiń alǵan ataqtaryńyz kóp beınettiń zeıneti ǵoı. Birtalaı saıası ózgeristerdiń kýási de boldyńyz. Endi bir sát balalyq shaǵyńyzǵa oralsaq...

-Men Shyǵys Qazaqstan oblysy Zaısan óńiriniń qyzymyn. Naǵashym Almatyda boldy da, sheshem qaıtys bolǵannan keıin úsh inisimen birge meni sol jerge alyp keldi. Aǵaıym «muǵalim bolasyń» dep, meni QazPI-diń rabfagyna oqýǵa túsirdi. Ol osy oblystyń Eńbekshiqazaq aýdanyna qarasty Qarakemer aýylynda bolatyn. Sonda jarty jyldaı oqydym, ustazdarym meniń án aıtatynymdy bilip alǵan soń kontsertterge qatystyryp júrdi. Birde sol jerge Eńbekshiqazaq teatry kelip óner kórsetti. Qurbymyz ekeýmiz sondaı qyzyqtyq. Sodan bir túnde ekeýmiz sol teatrǵa kelip ornalastyq. Túsken oqýymyz jaıyna qaldy. Bir jyldaı teatrda eńbek ettik. Sodan «qoı, oqymasaq bolmas» dep, Almatydaǵy teatr ýchılışesine oqýǵa tústik.

1941 jyly oqý bitirgen soń meni Almatydaǵy qazaq drama tetryna alyp qalǵysy keldi, biraq óz yqylasymmen suranyp, Jambyl oblystyq teatryna ornalastym. Ondaǵy oıym- kúızelip otyrǵan halyqtyń bel ortasynda óner kórsetip, kórermenderge rýh berý edi. Endi oılasam, sol eńbegim aqtalypty.

- «Bas ekeý bolmaı mal ekeý bolmaıdy» deıdi ǵoı, kimge turmysqa shyqtyńyz? Sony da bilgimiz keledi.

- Men Jambyl teatrynyń ártisi Sháripbaı Sákıevpen bas qostym. Aıgúl, Aıkúmis degen perzentterimdi dúnıege ákeldim. Ekinshi qyzym bir jarym jasqa kelgende kereýetten qulap, basyna zaqym kelip, shetinep ketti.

- Siz óleńdi bala kezden jazasyz ba, álde sahnada júrgende oıdan oı týyp, osyǵan yńǵaılandyńyz ba?

- Men jasymnan óleń-jyrǵa qumar boldym. Eki aǵaıym da mandolınmen, dombyramen oınaıtyn. Ol kezde Zaısannyń án aıtatyndary aýylǵa kelip, kontsert qoıyp turatyn. Men sonda esikten syǵalap tyńdap turatynmyn. Kishkene kezimde ájem «esiktiń aldyndaǵy aǵashtyń basyna shyǵyp, butasyn qushaqtap kórisý aıtatynsyń» deýshi edi. Sóıtsem, keýdemdi án kerneıdi eken ǵoı. Sol kezden ánniń ushyǵy bar eken. «Meni allataǵala osy ónerge ıtermelegeni eken-aý»- dep oılaımyn osy ýaqytta....

- Sahna kıesi jaıly kóńilge toqyǵan oılaryńyzdy asha otyrsańyz.

- Men sahnanyń kıesin sezingen adammyn. Sondyqtan keıingi jastarǵa aıtarym, ónerdi súıgen qaýym bir kelip, bir ketpese eken dep oılaımyn. Turaqty bolsa eken dep tilek qosam.

Jalpy, ónerdi súıý úshin júrekpen sezý kerek, halqyn súıý kerek. Avtordyń, rejısserdiń oıyn uǵýǵa umtylý kerek. Jastarymyzdyń bárine aıtar aqylym, sender teatrǵa ónerdi súıip kirińder, súımeseńder óner bolmaıdy. Ónerge shyn berilý, kúsh-qaıraty bitkenshe sahnada bolý kerek. Meniń aıtatynym osy.

-Jas akterlerdiń óneriniń damýyna óz yntasynan bólek jaqsy rejısser kerek, osy turǵyda rejısserdyń atqaratyn roli erekshe me dep oılaımyn.

-Jaqsy rejısser tájirıbeli ustaz bolady. Ol úlken-kishini úıretedi. Birin-biri tyńdaı bilse rejısser ózi de tárbıelenedi, akterdi da tárbıeleıdi.

Al óner adamdaryna kórsetiletin turmystyq-áleýmettik ahýal syn kótermeıdi. Mysalǵa, daryndy rejısser, akterlar kele qalsa turatyn úı-jaıy bolmaı ketip qalady. Osy jaǵdaıdy qolǵa alatyn ýaqyt ábden jetti. Darynǵa qamqorlyq bolmasa, ózi de alatyn jalaqysy kárilerdiń járdemaqysyndaı ǵana óner ıesi alǵanyn páterge tóleı me, bala-shaǵasyn asyraı ma? Sonymen kúıi kelmegen adam ketpegende qaıtedi? Aldaǵy ýaqytta óner ıelerine erekshe qamqorlyq bolsa dep oılaımyn.

- Osy ýaqyt aralyǵynda teatrdyń baǵyn ashqan rejısser degende kimderdiń esimin atar edińiz?

- Jambyl teatrynda soǵys ýaqytynda Ýkraınadan kóship kelgen Borıs Antonovıch Lýrıı degen bilimdi rejısser boldy. Men «Qobylandyda» Qobylandynyń qaryndasynyń rolin oınadym. Muhtar Áýezov ózi kelip rahmetin aıtty.

Semeı teatryna aýysqan sebebim, munda qazaq, orys teatry boldy. Orys teatrynan úlgi alǵym keldi. Sol armanyma jettim de...

Belgili rejıseerlar Báıten Omarov pen Esmuqan Obaev bizdi jetektep shyǵardy. Olar Semeı teatrynyń shańyraǵyn kóterdi.

-Siz osy teatrdyń tilekshisiz. Qazirdiń ózinde sahnaǵa shyqqanda bárin umytyp, jaınap ketesiz. Sonyń syry nede?

- Sahnaǵa shyqpas buryn eki-úsh kún meniń uıqym shala bolady. Qalaı oınaý kerektigin oılap kóz aldymnan ótkizem. Balalar menen úlgi alady. Spektakl barysynda olardy men jetekteýim kerek qoı. Sahnaǵa shyqsam soǵan kúsh-jigerimdi salam. Ondaıda aýyryp turǵanyńdy da umytyp ketesiń.

- Siz qazir sahnaǵa sırek shyǵasyz, kórermen saǵynyp qalatyn shyǵar?

- Men oınaıdy degende halyq kóp keledi, shyn kóńilmen qarsy alady. Uzaq qol soǵady. Osyndaı sátte káriligińdi bir sát umytyp ketesiń. Jasaryp ketkendeı áserde bolasyń...

- Teatr akterisiz, kınoda oınap kórdińiz be?

- Kınoǵa talpynbaıtyn men sahnany ǵana jaqsy kóremin. Meniń júrek qalaýym basqasha, sondyqtan kınoǵa shaqyrǵanda barmadym. Teledıdarǵa túsýge de asa qyzyqpaımyn. Sahnada oınasam men óz múmkindigimdi tolyq kórsete alamyn. Bul qandaı ádet ekenin ózim de bilmeımin...

- Siz halyqtyń kóńilinen shyǵýǵa, roldiń maǵynasyn ashýǵa tyrysasyz. Kórermen men akterdiń ózara baılanysy jaıly aıta otyrsańyz.

- Sahnaǵa shyqqanda kórermenge tesireıip qaraǵan adam emespin. Jalpy akter oıyn buzbaý kerek. Men qasymdaǵy rol oınaýshynyń suraǵyna qaraı jaýap berýim kerek. Daýys kólemine ishki jan-dúnıeńdi qosyp oıly, keıde oınaqy jaýap berý úshin ózińniń ár sózińdi, qımylyńdy jiti baqylaı bilý kerek. Qysqasy, ózińmen óziń bolyp, roldiń maǵynasyn ashý qajet.

Men «Kelinder kóterilisinde» mynany baıqadym. Sham janǵannan keıin ózbektiń Farmon báıbishesi sahnada bılep júredi. Osy kezde kórermen de bıge qosylady, keıde tipti sahnaǵa da shyǵyp ketetin kezderi bolady. Nemese sahnanyń aldynda qosylyp bılep turady. Bul spektakldiń áserinen bolatyny aıqyn.

Kúlásh Syrymbetqyzy osyny aıtyp boldy da tereze aldynda turǵan óleń dápterin alyp, ornyna qaıta otyryp júrekti terbep shyqqan ótken kúnniń belgisindeı bir jyrdy tebirene oqı bastady:

Shirkin, jastyq, qaıta oralyp keler me,

Egdelikti qýat bitip jeńer me,

Álsiregen álime bir kúsh bitse,

Sonda meniń áriptesim sener me?

Qaıda meniń án salatyn kúnderim ,

Aıǵa qarap armandaıtyn túnderim,

Mine, qazir qyzyǵamyn jastarǵa,

Jaınap turǵan balbul janyp júzderi...

- Árıne, ulǵaıǵan jan ótken kúndi ańsaıdy, jaýqazyndaı jastyq shaqtyń qas qaǵymda alystap ketkenine ókinedi. Biraq ár jastyń óz ádemiligi bolady ǵoı. Siz kóp ánderdiń mátinin ózim jazdym dedińiz, solardyń atyn atasańyz.

- Halyqtyń «Jetiaral jerim-aı», «Ahaý arman», «Qos jeńgeı sylqym-aı», «Jaınashy qurbym», «Janaı bulbul», «Oı janym», «Aı, aı,kókem» ánderine sóz jazdym, óıtkeni halyq ándenri uıqasqa shyǵara salǵan, ánniń maǵynasyn asha almaıtyn mátinnen quralatyn kezderi bolady. Men aıtqan ánim áserli bolsyn dep ádemi sózderimmen árlep, jańa mán bere bildim dep oılaımyn.

- Teatr sahnasynda keı kezde kezdeısoq oqıǵa bolady, sonda ne isteýshi edińizder?

- Keıde aıtaıyn degen sózińdi umytyp qalasyń da amal joq basqa sóz qosylyp ketedi. Spektaklden keıin sóz taýyp ketkenińe qýanyp ta qaıtatyn kez bolady..

Kúlásh Sákıeva sahnada rol oınaý úshin sol tektes keıipkerdi izdep, tynys-tirshigin zertteý degenge múlde qarsy. Alaıda óziniń akterlik jolyn aıqyndap, ataq-dańqqa bólegen Ábdilda Tájibaevtyń «Maıra» spektakline kóp daıyndyqpen kelgeni ras. Tipten Maıranyń júrip ótken joldarymen sonaý Ombyǵa deıin Ertis boıymen baryp-qaıtýynda da bir syr bar. Ol «Maıra osy jolmen júrgende qandaı oıda boldy eken, onyń shyǵarǵan, oryndaǵan ánderine Ertistiń asaý tolqyndarynyń áseri boldy ma eken? Maırany tolǵandyrǵan qandaı oı?- degen suraqtar ony kóp mazalaıtyn. Tipten tań biline Ertis jaǵasyna baryp, Maıra ómirin kóz aldyna elestetti, jaǵaǵa urǵan erke tolqynnan syr uqty.

Kúlásh ár spektakldegi rolge uıqy-kúlkisiz jan-tánimen, asa yjdaHattylyqpen daıyndalatyn. Ol Muhtar Áýezovtyń «Eńlik -Kebegindegi» Eńlik, «Qaraqypshaq Qobylandysyndaǵy» Kúnikeı, «Qozy Kórpesh- Baıan sulýda» Baıan sulý», «Aıman-Sholpanda» Aıman, «Qarakózde» Marjan, «Aqanseri-Aqtoqtyda» Aqtoqty, Evgenıı Brýsılovskııdiń «Er Tarǵyn» operasynda Aqjúnis, «Qyz Jibekte» Jibek, Shıllerdiń «Zulymdyq pen mahabbatynda» Lýızanyń, Qasym Amanjolovtyń «Dosymnyń úılenýinde» Bıǵanym rolderin sheber oınady. Spektakl barysynda óziniń qabiletin halyq ánderimen árlegen ánshi kópshilik kóńilinen shyǵyp, zor qoshemetke bólendi.

Kúlásh Sákıeva alǵash Semeı oblystyq drama teatrynda ótken kúnderin árkez saǵynyshpen eske alady: - Qazaqstannyń halyq ártisi Islambek Qydyralın, Gúlsim Ábdirahmanova, Qazaqstannyń eńbek sińirgen ártisi Jumash Sákenova, Hasen Baıyrmanov, Qazaqstannyń halyq ártisi, rejısser Núrıdden Atahanov syndy sahna maıtalmandary teatrdyń dańqyn asyryp, sahna sheberliginiń qyr-syrymen bólisken aıaýly jandar edi. Al maıtalman rejısserlarymyz Báıten Omarov pen Esmuqan Obaevtyń teatrǵa sińirgen eńbekteri ólsheýsiz ǵoı,- deıdi apamyz.

Osy oraıda ánshilikti drama akteri ónerimen ushtastyrǵan tamasha sazger Tursynǵazy Rahımovtyń lebizin bilsek:

«Kúlásh Sákıeva 90-nan asqanǵa deıin sahnadan qalǵan joq. Ánshiliginiń ózi erekshe. Shahan Mýsınmen birge sahnada óner kórsetken. Ol kisiniń sahnaǵa shyǵarmaǵan roli joq dese de bolǵandaı. Erterekte bárimiz jaz boıy gastrolde júremiz. Úlken-kishi demeı, sypaıy qaljyńdasyp júremiz. Teatr akterleriniń barlyǵy ol kisiniń shákirti desek artyq aıtpaǵan bolar edik»,- deıdi ol.

Qazaqstannyń halyq ártisi Kúlásh Sákıevanyń 80 jasqa tolǵan mereıtoıynda rejısser Shoqan Káribaevtyń «Kelinder kóterilisi» spektakli sahnada qoıyldy. Saıd Ahmetovtiń bul spektakli bir kezde «Shyǵys kelinderi» dep atalatyn. Osy joly Kúlásh Farman ájeniń rolin sheber oınady. Al aktrısanyń 85 jasqa tolýyna oraı ázirlengen Sáken Júnisovtiń «Qysylǵannan qyz boldyq» spektaklinde saýynshy ájeniń rolinde asqan sheberlikpen oınaǵany úshin Kúlásh Sákıeva «Parasat» ordenimen marapattaldy.

Halyq qalaýlysy, sahna sheberi Kúlásh ómirin ánmen árlep, sahnalyq beınelerin sátti somdaǵan óner qaıratkeri.

Ana sútimen daryǵan án óneri Kúláshtiń baǵyn ashty. Týmysynan qıyndyqqa moıymaı, asqaq án qushaǵynda júrgen jany jaısań óner ıesiniń oryndaǵan ánderi oınaqylyǵymen, ázilimen áserli.

Ónerim án sońynda neshe jyldaı,

Ár kúnim, ár saǵatym tartqan symdaı,

Syrymdy árkez ánmen uqtyrýǵa,

Týlaıdy keýdemdegi júrek tynbaı,- dep kóńildiń keıbir sátterinde birer aýyz óleń shyǵaratyn óner ıesi búginde kemeldi shaǵynda.

Otbasynda ana baqytyn kórip, óner shyńynan kóterilgen el erkesi Qazaqstannyń halyq ártisi úsh ordendi Kúlásh Sákıevanyń jýyrda Semeıdiń ólketaný mýzeıinde 95 jasqa tolǵan mereıtoıy atalyp ótti.

Qazaqstannyń halyq ártisi Kúlásh Syrymbetqyzy eki dúrkin «Qurmet belgisi» ordeniniń, sonymen qatar «Parasat» ordeniniń ıegeri.

Qazaqstannyń halyq ártis Asqar Toqpanovtan sahna sheberligin úırenip, óner jolyna túsken, dala sahnasynan syr uqqan, kásibı sahnada shynyǵyp, óner tarlanyna aınalǵan Kúlásh Sákıevanyń júrip ótken ómir joly keıingige úlgi-ónege.

Altyn Imanbaeva, Qazaqstannyń eńbek sińirgen qaıratkeri