Sahnaǵa shegip shyǵatyn «shegirtkeler» shekten shyqty - Ahmetbek Nursıla
ASTANA. KAZINFORM – Qatarynan «oza týǵan» tanymal óner juldyzdarynyń qatarynan qamalýy qoǵamda áli qyzý talqylanyp jatyr. Ázilkesh pen ánshilerdiń áreketi durys pa, ánsheıinde jurtty sabyrǵa shaqyratyn óner ıeleri nege sabyrsyzdyq tanytty? Bul oqıǵaǵa qatysty tanymal azamattardyń pikirin surap bilgen edik.
Belgili kásipker, psıholog Ahmetbek Nursıla qaı zamanda bolsyn qoǵamnyń qadir tutar tulǵalary bolatynyn, ókinishke qaraı, qazirgi qoǵamda qundylyǵy joq, mádenıetten jurdaı saıqymazaqtar, ánshisymaq «shegirtkeler» juldyz bolǵanyn aıtady:
«Áset Naımanbaıuly aıtqandaı:
Asýǵa at shyqpaıtyn arba shyqty,
Qandy balaq qyrandy qarǵa jyqty,
Qopada ógiz soqqan jolbarystar,
Qoıannan qoryqqanynan jarǵa buqty.ıAǵnı, qoǵam daǵdaryp turǵan kezeńde qoǵamnyń qadirlisi bolyp, juldyzdar bolyp «shegirtkeler» shyqty. Baıaǵyda Balýan Sholaq, Aqan seri, Birjan sal sııaqty tulǵalardy adamdar tóbesine kótergen. Olardyń mádenıeti, kisiligi, adamgershiligi óte joǵary bolǵan. Elge sózi ótip, qorǵan bolǵan. Sondyqtan halyq olardy qurmettedi. Al qazirgi toqyraý zamanynda dúnıeqońyz saıqymazaq, bilimsiz adamdar tórge shyqty. Eń qorqynyshtysy, halyq solardyń soraqy qylyqtaryn qorǵap jatyr.
Meırambek Bespaev ta «erkelik qoı» dep qorǵap álek. Erkeligin áke-sheshesine kórsetsin. Halyqqa ondaı erkelik júrmeıdi. Іship alyp, qoǵamdyq jerde urys, tóbeles shyǵaryp, sahnaǵa anasha shegip shyǵý degen baryp turǵan bassyzdyq. Bul qoǵamnyń deńgeıin de kórsetedi. Damyǵan elderde para alǵan, birdeńe búldirgen mınıstrler birden jumystan ketetin edi. Qoǵam aldynda júrgen adamdar shalys bassa, qarabet bolyp, eldiń aldyna shyqpaýshy edi.
Tursynbek Qabatov ospadar qylyq jasap alyp, sahanaǵa shyǵyp, sonysyn dáriptep kúlkige aınaldyryp tur. Oǵan halyq máz. Bul — qoǵam aldyndaǵy halyqtyń qasireti. Esek ozyp, tulparlardyń mereıi aqsaǵan zaman bolyp tur. Halyqtyń aldynda júrip osyndaı ospadar qylyq kórsetkender elge úlgi sanalsa, qoǵam eshqashan túzelmeıdi».
Halyqtyń súıiktisine aınalǵan Meırambek Besbaev eldiń qyzý talqysyna túsken Qaırat Nurtastyń oqıǵasyna qatysty pikir bildirdi.
«Keıde esigińnen kúlip kirip, tekemetińdi tilip ketetinder bolady. Adam alasy ishinde ǵoı. Dosym dep júrip domalaq aryz jazyp, quny qymbat dostyqty qastyqqa aıyrbastaı salatyn haıýandar kóbeıdi. Qaırat inim, qudaı janyńa qýat bersin. Bulttyń artynan kún shyǵatyny sekildi, ár jamandyqtyń artynan úlken jaqsylyq bolatyny aqıqat. Endi abaılap júrshi. Mańaıynda júrgenderdi suryptap qarashy. Seni satqan aqymaqtyń jazasyn Alla beredi. Alla ádiletti», — dedi Besbaev.
Jýyrda ǵana ShYU sammıtine kelgen qurmetti meımandarǵa ánnen shashý shashqan Qazaqstannyń eńbek sińirgen ártisi Maıra Muhamedqyzynyń aıtýynsha, qansha jerden juldyz bol, qoǵamdyq orynda tártip saqtaý — ár azamattyń qoǵam aldyndaǵy paryzy.
«Máseleniń tamyry ánshiler fonogrammamen án aıtyp ońaı tabysqa jetip juldyz bolýynda jatyr. Eger mańdaı termen janyn jep aıtyp óner kórsetse, árbir tabysy men jetistigine shúkirlik etip abyroıyn bıik sanar edi. Ókinishtisi sol, halyq fonogrammamen aıtatynyn bile tura toılaryna shaqyrady, kontsertterine barady. „Qarǵa qarǵanyń kózin shuqymaıdy“ demekshi, keıbir ánshiler sondaı zańsyz áreketter jasaǵan áriptesterine qoldaý kórsetip jatqandarynyń ózi durys emes! Qalaı túsinýge bolady? Súrinbeıtin adam joq. Biraq, betke ustar juldyzdar súrinip júrse, basqalardan ne qaıyr? „Taıaqtyń eki ushy bar“ demekshi, sondaı jaǵdaıǵa ıtermeleıtin adamdar da joq emes! Fotoǵa túskish fanattar da keıde tártip saqtamaıtyny ras. Ár aıypqa jaza bar demekshi, zań aldynda bárimiz birdeımiz!» — dedi Maıra Muhamedqyzy.
Bul oqıǵaǵa qatysty kóptegen óner juldyzyna habarlastyq. Áriptesterin renjitkisi kelmedi me, álde óziniń de búldirgen jónsiz áreketteri boldy ma, áıteýir pikir bildirýden bas tartty.
