Sahnadaǵy 70 jyl: Búgin — Asanáli Áshimovtiń týǵan kúni

ASTANA. KAZINFORM — Búgin — abyz tulǵa Asanáli Áshimovtiń týǵan kúni. Kózi tirisinde-aq ańyz adamǵa aınalǵan sahna sańlaǵy «Búgin LIVE» baǵdarlamasyna onlaın baılanysqa shyǵyp, suhbat berdi. 

— 88 degen ońaı jas emes. Týǵan kúnimmen halqym, dostarym quttyqtap jatyr, raqmet. Týǵan kúnińiz dep quttyqtap jatqan halqyma rızamyn. Tań atqaly telefonǵa tynyshtyq joq, — dedi akter.

Ónerdiń aqsúıegi buǵan deıingi suhbattarynyń birinde Abaı men Kenesarynyń rólin somdaǵysy keletinin aıtqan edi. Akter toqsanǵa taıasa da kınoǵa túsýge áli de daıyn ekenin aıtady.

— Óner jolyna kelgennen keıin ómirimiz sońyna deıin ónermen ótti ǵoı. Sondyqtan jaqsy materıaldar bolsa, jaqsy rejıssýra bolsa, men kınoǵa túsýge ár ýaqytta daıynmyn, — deıdi ol.

Asanáli Áshimov alǵashynda akter bolýdy qalamaǵan eken. Tipti arman qýyp Almatyǵa kelgende de aldymen Aýyl sharýashylyǵy ınstıtýtyna oqýǵa tapsyrypty.

— Aýyldyń balasy bolǵan soń, basynda sol Aýyl sharýashylyǵy ınstıtýtyna kelgenmin. Akterlik degen tipti oıda da joq edi. Asqar Toqpanov Máskeýden oqýyn bitirip kelip, sol jyly konservatorııa janynan bir bólimshe ashty. Kezdeısoq sol bólimshege tap boldyq. Bul oılamaǵan jerden boldy. Áıteýir oqýǵa túsip, bir oqýdy oqýǵa týra keldi. Ata-anam aıtqan soń, Almatyda qalý kerek boldy. Solaı taǵdyr meni osy jolǵa aıdap keldi. Bul salaǵa kelgenime ókinbeımin. Biraq basynda onsha qulyqty bolmadym. Mahabbatpen kelgen joqpyn. Biraq qazir mahabbatpen ketip bara jatyrmyz ǵoı. Ónerdi syılap, ónerdiń uly ekenin túsinip, qazir sonyń sońynda júrmiz, — deıdi óner ıesi.

70 jylǵa jýyq ǵumyryn óner salasyna arnaǵan akter qazaq kınosynyń búgini men bolashaǵyna baǵa berdi.

— Qazir zaman ózgerdi. Biz árqashan optımıstpiz. Jaqsy jaǵdaılar bolatyn shyǵar degen úmittemin. Qazir talpynyp kele jatqan jastar bar. Bir joǵary, bir tómen túsetin ýaqyt bolady ǵoı. Óner degen — sol. Sondyqtan men keleshek jastarǵa senemin. Qazir óner ózgerip, alǵa qaraı talpynyp, izdenip kele jatqan kez ǵoı. Sondyqtan qazirgi jastar burynǵy ulylar salyp ketken dańǵyl joldy qýyp, sony negizge ala otyryp ósse, ónse bári jaqsy bolady. Men soǵan tilektespin. Jastar ótkenin, tarıhyn umytpaý kerek. Ónerdiń úlken joly bar ekenin esten shyǵarmaýlary qajet. Sonda kóp nárse oryndalady, — deıdi qazaq kınosynyń alyp tulǵasy.

Óner abyzy búginge deıin «Qyz Jibek», «Atamannyń aqyry», «Transsibir júrdek poıyzy», «Án qanaty», «Jaýshy», «Nan dámi», «Qazaqy oqıǵa», «Siz kimsiz, K. myrza?» jáne «Bulǵarlar týraly baıan» fılmderi arqyly qalyń kórermenniń júregine jol tapqan. Ol ózi túsken týyndylardy bólip-jarmaıtynyn aıtady. Dese de, júregine jaqyn jobalaryn da tizip berdi.

— Meniń 5 balam boldy. 5 balamnyń árqaısysyn da birdeı jaqsy kóremin. Sondyqtan meniń ishten týǵan shyǵarmalarymnyń bárine de kúshim, júıkem jumsaldy. Sondyqtan mynaý jaqsy, mynaý jaman dep aıta almaımyn. Biraq sonyń ishinde iriktelip, halyqtyń aldyna kóp barǵan — «Qyz Jibektegi» Bekejan, «Atamannyń aqyryndaǵy» Shadııar. Ózim túsken fılmderden alǵa shyqqany da sol — «Qyz Jibek», «Atamannyń aqyry», «Transsibir júrdek poıyzy» ǵoı. Meniń trılogııam — osylar, — deıdi ańyz adam.

Aıta keteıik, birneshe kún buryn Qyzylordada Asanáli Áshimovtiń qatysýymen halyqaralyq teatrlar festıvali ótken edi.