Sahna syrtyndaǵy OVO: álemdik shoý qalaı daıyndalady

Sahnadaǵy 53 ártistiń artynda kimder tur

Kórermen nazary kóbine ártisterge aýady. Alaıda OVO – ondaǵan mamannyń eńbegi toǵysqan aýqymdy joba.

Cirque du Soleil-diń resmı ókili Janı Malleniń aıtýynsha, OVO shoýynyń gastroldik quramynda 53 ártis bar. Tehnıkalyq mamandardy qosqanda komandanyń jalpy sany júzge jýyqtaıdy. Buǵan qosa, ár qalada jergilikti qyzmetkerler de jumysqa tartylady.

– 2026 jyly Cirque du Soleil álem boıynsha 17 túrli shoý usynady. OVO – solardyń biri. Qazaqstanda dál osy qoıylym kórsetiledi. Shoýdaǵy barlyq keıipker jándikter áleminen alynǵan. Sondyqtan ártister kóbelekke, órmekshige, ınelikke jáne basqa da jándikterge aınalady, – dedi Janı Malle.

Qazaqstan OVO shoýyn qabyldap otyrǵan 47-elge aınaldy. Alǵash ret 2009 jyly sahnalanǵan qoıylymdy osy ýaqytqa deıin álem boıynsha 10 mıllıonnan astam kórermen tamashalaǵan.

Qoıylym quramynda álemniń 25 elinen kelgen 53 ártis óner kórsetedi. Olar 17 tilde sóıleıdi. Soǵan qaramastan sahnada bir maqsatqa jumylǵan komanda retinde jumys isteıdi.

Janı Malle atap ótkendeı, qoıylymnyń sahnalyq kelbetin jasaýǵa shamamen 200 tiginshi men sheber qatysady. Olar ár keıipkerdiń kıimin ázirlep qana qoımaı, gastrol kezinde olardyń kútimine de jaýap beredi.

Bir shoý úshin eki júk ushaǵy qajet

OVO barǵan jerine tek ártisterdi ǵana emes, qoıylymǵa qajetti barlyq jabdyqty birge alyp júredi. Dekoratsııalar, rekvızıtter, jaryq jáne dybys qurylǵylary eki júk ushaǵymen tasymaldanady. Gastroldik qurammen birge qoıylymnyń tehnıkalyq jabdyqtary da kóship júredi. Onyń ishinde bes kir jýatyn mashına bar.

OVO shoýynyń ártisi, áýe gımnasy Artýr Dýdovtyń aıtýynsha, sahnany tolyq qurastyrýǵa shamamen 12 saǵat qajet.

– Qoıylym bastalǵanǵa deıin úlken jumys atqarylady. Jabdyqtar jetkiziledi, sahna qurastyrylady, barlyq júıe tekseriledi. Kórermen sonyń nátıjesin ǵana kóredi, – dedi Artýr Dýdov.

Onyń sózinshe, qoıylymnyń úzdiksiz ótýin 47 tehnıkalyq maman qamtamasyz etedi. Buǵan jergilikti qyzmetkerlerdiń eńbegi de qosylady.

Jándikter álemine qurylǵan qoıylym

OVO portýgal tilinen aýdarǵanda «jumyrtqa» degen maǵynany bildiredi. Sondyqtan jumyrtqa ómirdiń bastalýyn beıneleıtin negizgi sımvol retinde alynǵan.

Oqıǵa jándikter álemine tap bolǵan shybynnyń tóńireginde órbıdi. Jańa orta, jańa tanystyqtar jáne mahabbat hıkaıasy kórermendi qııalǵa toly álemge jeteleıdi.

Jándikter álemin kórsetý úshin sahnalyq bezendirýge erekshe kóńil bólingen. Keńistik ár kóriniste ózgerip otyrady. Bir sátte ormandy elestetse, kelesi sátte úńgirdi nemese jumbaq mekendi kóz aldyńyzǵa ákeledi.

Sahnadaǵy eń erekshe qurylymdardyń biri – kóp deńgeıli qabyrǵa. Ártister onyń ústimen qozǵalyp, ishine kirip, akrobatıkalyq nómirler oryndaıdy. Sahnalyq kórinisti gıbıskýs gúlderi, iri qyzǵaldaqtar men túrli ósimdik beıneleri tolyqtyrady.

Qoıylymdaǵy negizgi beınelerdiń biri – kóbelek. Áýe gımnastary Artýr Dýdov pen Esmıra Kýlıeva osy keıipkerlerdi somdaıdy. Olardyń aıtýynsha, akrobatıkalyq qımyldar arqyly kóbelektiń jeńildigi men náziktigin jetkizýge tyrysady.

Jeti mýzykant jáne jandy áýen

OVO shoýynyń taǵy bir ereksheligi – jandy mýzyka. Qoıylym barysynda jeti mýzykant óner kórsetedi. Mýzykalyq shyǵarmalardyń negizine brazılııalyq áýender alynǵan. Sondyqtan soqpaly aspaptardyń úni erekshe oryn alady.

– Mýzyka qoıylymnyń ajyramas bóligi. Jarqyn yrǵaqtar men soqpaly aspaptardyń úni OVO áleminiń erekshe atmosferasyn qalyptastyrady, – dedi Janı Malle.

Bul shoýda mýzyka sahnadaǵy áreketke beıimdelip otyrady. Sondyqtan mýzykanttar, vokalıst jáne dybys mamandary qoıylym boıy ózara baılanysta jumys isteıdi. Mýzykanttar sahna syrtynda ornalasqanymen, ártister men kórermenderdi kórip otyrady.

OVO shoýynyń ártisi, áýe gımnasy Esmıra Kýlıevanyń aıtýynsha, olardyń nómiri eń názik jaratylystyń ózi batyl ári qaısar bola alatynyn kórsetýge arnalǵan.

– Bizdiń nómir shamamen alty mınýtqa sozylady. Biraq sol birneshe mınýttyń artynda uzaq daıyndyq jatyr. Makııaj jasaýǵa eki saǵatqa jýyq ýaqyt ketedi. Bas kıim men kostıýmdi daıyndaýdyń da óz qıyndyǵy bar, – dedi Esmıra Kýlıeva.

Esmıra Kýlıeva Cirque du Soleil quramyna úsh aı buryn qosylǵan. Degenmen tsırk ónerinde júrgenine 17 jyl bolǵan. Ol Kıevtegi estrada-tsırk akademııasyn támamdap, álemniń ár túkpirinde óner kórsetken.

– Cirque du Soleil quramynda jumys isteý meniń kópten bergi armanym edi. Qazir sol armanym oryndaldy. Ár qoıylym aldynda tolqımyn. Bul jaýapkershilikti sezinýge jáne jınaqy bolýǵa kómektesedi, – dep bólisti ol.

Onyń aıtýynsha, kórermenderdi áserli akrobatıka, jandy mýzyka, erekshe sahnalyq kórinis pen kóz tartarlyq kostıýmder kútedi.

Qazaqstandaǵy arena álemdik deńgeıge saı

Artýr Dýdov Qazaqstandaǵy jaǵdaıǵa joǵary baǵa berdi.

– Álemniń kóptegen elinde óner kórsettik. Keıbir arenalardyń deńgeıi ártúrli bolady. Al Qazaqstanda kórgenimiz halyqaralyq talaptarǵa tolyq saı keledi, – dedi ol.

Ártistiń aıtýynsha, Astana da erekshe áser qaldyrǵan. Gastroldik quram qaladaǵy birneshe mádenı jáne týrıstik nysandy aralap úlgergen.

Astanadaǵy kórsetilimderden keıin OVO alǵash ret Almatyǵa jol tartady. Keıin gastroldik sapar Germanııada jalǵasady.

Qazaqstandaǵy týr aıasynda barlyǵy 14 qoıylym josparlanǵan. Uıymdastyrýshylardyń boljamynsha, olardy 70 myńnan astam kórermen tamashalaıdy.

1984 jyly qurylǵan Cirque du Soleil búginge deıin álemniń 86 elinde óner kórsetip, 400 mıllıonnan astam kórermen jınaǵan. Qazir kompanııa quramynda 80-nen astam ult ókilderi eńbek etedi. Jalpy qyzmetkerler sany 4 myńnan asady, onyń ishinde 1 200-i ártis.

OVO-nyń ereksheligi tek akrobatıkalyq nómirlerde emes. Munda teatr, mýzyka, tsırk óneri men kúrdeli tehnıkalyq sheshimder bir arnaǵa toǵysqan. Sondyqtan kórermen birneshe saǵattyq áserli shoý tamashalaǵanymen, onyń artynda júzdegen adamnyń eńbegi men uzaq daıyndyq turǵanyn ańǵara bermeıdi.

Aıta keteıik, Qazaqstannyń tsırk ártisteri halyqaralyq festıvaldiń jeńimpazy atanǵan edi.