Saharada qar jaýdy
ASTANA. KAZINFORM – Álemdegi eń úlken shól sanalatyn Saharada qar jaýdy, tipti palma aǵashtarynyń arasynda shanamen syrǵanaýǵa da bolady.
Mundaı qubylys bul óńirde óte sırek kezdesedi. Shamamen on jylda bir ret bolady.
10 naýryz kúni tómen qysym aımaǵy Pıreneı túbeginen Soltústik Afrıkaǵa qaraı jyljyp, óńirge ylǵaldy aýa ákeldi. Sınoptıkter boljaǵandaı, bul aýa sýyq aýa massalarymen túıisip, temperatýra nólden tómen túsip, qar jaýdy.
11 naýryzda qar negizinen Atlas taýlarynda jáne basqa da bıik aımaqtarda jaýdy, biraq shóldiń shetki bólikterinde de baıqaldy. Weather.com portalynyń málimetinshe, dál osy taý jotalary mańynda «Jerorta teńizinen kelgen ylǵaldy aýa massalary bıiktiktegi sýyq aýamen túıisedi», sonyń nátıjesinde «tipti shól mańynda da qar jaýýy múmkin».
Alaıda qar jamylǵysy uzaq saqtalmaıdy: búgin Soltústik Afrıkada qaıtadan kún ashyq, temperatýra aıtarlyqtaı kóterildi, sondyqtan jaqyn ýaqytta shólde qar jaýmaıdy.
Aıta ketelik Pavlodar oblysynda qar qursaýynan 30-ǵa jýyq adam qutqarylǵan edi.