Saha respýblıkasy asyq atýdan Dúnıejúzilik kóshpendiler oıyndaryna qatysady
ASTANA. KAZINFORM – Búgin Astana qalasynda Saha (ıAkýtııa) respýblıkasynyń Qazaqstandaǵy kúnderi bastaldy. Astana men Almaty qalalarynda 21 sáýirge deıin jalǵasatyn kúnder aıasynda baýyrlas eki el arasyndaǵy mádenı, sporttyq, iskerlik baǵytta kóptegen shara uıymdastyrý josparlanǵan.
QR Asyq atý federatsııasynyń baspasóz qyzmeti málim etkendeı, is-sharanyń birinshi kúni Qazaqstan prezıdenti Qasym-Jomart Toqaev Saha respýblıkasynyń basshysy Aısen Nıkolaevty qabyldap eki el arasyndaǵy aýyl sharýashylyǵy, ken óndirý, tsıfrlandyrý jáne týrızm salalaryndaǵy yntymaqtastyq talqylandy.
Sonymen qatar QR Asyq atý federatsııasynyń atqarýshy dırektory Jomart Sabyrjanuly men Saha respýblıkasy memlekettik bıýdjettik mekemesiniń dırektory Gennadıı Vasılev Saha respýblıkasy Dene shynyqtyrý jáne sport mınıstrliginiń Vasılıı Manchaary atyndaǵy ulttyq sport túrleri ortalyǵy men QR asyq atý federatsııasy arasynda yntymaqtastyq týraly memorandýmǵa qol qoıdy.
Aldaǵy ýaqytta qazaqtyń ulttyq asyq atý jáne bes asyq oıyny Saha respýblıkasynda damytylyp, birlesken oqý-jattyǵý jıyndary men jarystar ótkiziletin jáne Dúnıejúzilik kóshpendiler oıyndaryna Saha respýblıkasy Asyq atýdan komanda ákeletin boldy.
Budan bólek ıakýttyń Habylyk jáne Haamyska oıyndaryn da birlese damytý jóninde kelisildi.