Saǵyntaev jumys saparymen Mańǵystaý oblysyna bardy
ASTANA. QazAqparat - QR Premer-Mınıstri Baqytjan Saǵyntaev QR Prezıdentiniń tapsyrmasy boıynsha Mańǵystaý oblysyna jumys saparymen keldi. Munda Úkimet basshysy memlekettik baǵdarlamalar men «Qazaqstannyń úshinshi jańǵyrýy: jahandyq básekege qabilettilik» Joldaýy aıasyndaǵy mindetterdiń oryndalý barysymen tanysyp qaıtpaq, dep habarlady primeminister.kz.
Úkimet basshysy sonymen qatar Mańǵystaý jerinde óńirdiń kólik-logıstıkasyn damytý áleýeti men bızneske qoldaý kórsetý baǵytyndaǵy sharalardyń júzege asyrylýy týraly bilmek. Baqytjan Saǵyntaev Aqtaýǵa Erevanda (Armenııa) ótken EÚAK-niń kezekti otyrysynan soń keldi.
Jumys sapary barysynda Baqytjan Saǵyntaev oblysty damytýdyń ózekti máseleleri boıynsha óńir halqymen jáne aktıvimen kezdesip, shaǵyn jáne orta bıznesti damytý máseleleri boıynsha, «Atameken» UKP óńirlik keńesiniń ókilderimen júzdespek.
Buǵan qosa Premer-Mınıstri Quryq kentindegi parom kesheniniń jumysymen jáne keshenniń ekinshi bóliginiń qurylysymen tanysyp, áleýmettik ınfraqurylym jáne ónerkásip kásiporyndaryn aralamaqshy.
Oblysqa kelisimen 25 qazan kúni Baqytjan Saǵyntaev Aqtaýdaǵy shaǵyn aýdandardyń birinde ornalasqan, jataqhanada boldy. Atalmysh nysan jas mamandardy baspanamen jáne jumyssyz turǵyndardy eńbekpen qamtýǵa baǵyttalǵan «Jańa serpin» óńirlik baǵdarlamasyn júzege asyrý aıasynda salyndy.
Búdan soń Úkimet basshysy «Bıznestiń jol kartasy-2020» baǵdarlamasy aıasynda salynǵan «Sofı Med Grýpp» kópsalaly klınıkasynda boldy.
