Saǵyntaev jolaıryq qurylysynyń barysymen tanysty
ALMATY. QazAqparat - Almaty qalasynyń ákimi Baqytjan Saǵyntaev ınjenerlik jáne áleýmettik ınfraqurylymdar salynyp jatqan birqatar yqshamaýdandy aralady, sondaı-aq aýmaqtardy abattandyrý jobalarymen tanysty, dep habarlaıdy QazAqparat tilshisi.
Almaty ákimi Instagram-daǵy paraqshasynda jumys saparymen trolleıbýs parkin jetildirý,júrgizýshilerdiń áleýmettik jaǵdaıy men LRT-ny damytý, sondaı-aq Alataý aýdanyndaǵy «Alǵabas» yqshamaýdanynda ınjenerlik ınfraqurylym salý jobalarymen tanysqanyn habarlady.
Munda 13,5 shaqyrym sýmen jabdyqtaý jáne 17 shaqyrym sý burý jelileri salynady. Joldy tegisteý men jol tóseý jumystary júrgizilýde.
«Kólik jolaıryǵynyń qurylys alańdarynda boldym. Rysqulov dańǵyly men Emtsov kóshesiniń qıylysyndaǵy qurylys jumysyn jyl sońyna deıin, Seıfýllın dańǵyly men Jansúgirov kóshesindegi jumysty kelesi jyldyń birinshi jartyjyldyǵynda aıaqtaý josparda bar», - dep jazdy B. Saǵyntaev.
Onyń tapsyrmasy boıynsha energotıimdilik jáne ınfraqurylymdyq damý, qalalyq mobıldilik basqarmalary ınfraqurylymdyq jeliler tartylǵan Tóle bı kóshesindegi ýchaskelerdi retke keltiretin bolady.
Almaty ákimi sonymen qatar Alataý aýdanynyń «Saıaly» yqshamaýdanyndaǵy 1800 oryndyq mektep qurylysynyń barysymen tanysty. Osy jyldyń sońyna deıin paıdalanýǵa beriledi dep josparlanýda. Túrksib aýdanynyń Ogarev kóshesiniń boıyna zamanaýı balabaqsha men oqýshylar úıin salý josparda.
B. Saǵyntaev áýejaı skverin, Maıak toǵaıyn qalpyna keltirý jáne Boraldaı ózeniniń jaǵalaýyn jaqsartý jobalaryn qarady. Munda Alataý aýdanynyń «Kók-Qaınar» yqshamaýdanynyń turǵyndary úshin eresekterdiń demalýyna arnalǵan jańa qoǵamdyq keńistik jáne balalar men jasóspirimderge arnalǵan belsendi aımaqtar qurylady.
