Saǵyntaev: Jol polıtseılerine ala taıaqtar qaıtarylmaıdy
ASTANA. QazAqparat - QR Úkimet basshysy Baqytjan Saǵyntaev jol polıtseılerine ala taıaqtardy qaıtaryp berý týraly depýtattyq saýalǵa jaýap qaıtardy, dep habarlaıdy QazAqparat.
«Álemniń eń damyǵan elderinde (AQSh, Batys Eýropa elderi jáne EYDU t.b.) jol-patrýldik polıtsııasynyń jumysynda taıaqshalar qoldanylmaıdy, kólik quraldaryn toqtatý men jol júrisin retteýdi polıtseıler qol qıymylymen júzege asyrady. Kórsetilgen elderde halyqtyń avtomobıldený deńgeıi Qazaqstandaǵy deńgeıden birshama artyq. Sondyqtan da olarda polıtseılerdiń retteýi men olardyń jol qımyldaryn túsinýde qandaı da bir problemalar týyndamaıdy. Osyǵan baılanysty, shetelderdiń ozyq tájirıbesin eskere otyryp, Qazaqstan Respýblıkasynda qurylymdyq reformalardy iske asyrý jónindegi 2014-2015 jyldarǵa arnalǵan Jol kartasy jol-patrýldik polıtsııasynyń qyzmetin jetildirý, onyń ishinde taıaqshalardyń kúshin joıý boıynsha birqatar sharalar kózdelgen bolatyn. Jańa engizilimder polıtseılerdiń kólikti sebepsiz toqtatý sanyn aıtarlyqtaı qysqartýǵa jáne jol júrisine qatysýshylarmen zańsyz baılanystar sanyn azaıtýǵa múmkindik berdi», - dep atap ótilgen QR Parlamentiniń resmı saıtynda jarııalanǵan jaýapta.
Osy oraıda qazirgi ýaqytta Іshki ister mınıstrligi halyq arasynda qol qımylymen beriletin retteýshiniń sıgnaldarynyń maǵynasy týraly qosymsha túsindirý jumysyn júrgizip, sondaı-aq jol-patrýldik polıtsııasynyń qyzmetkerlerimen jol júrisin qolmen retteý ádisterin jetildirý boıynsha sabaq júrgizilip jatqandyǵy atap ótilgen.
Munymen qosa, jaryq shaǵylystyratyn nysandyq kúrtesheler men qolǵaptardyń jańa úlgileri bekitildi, olarmen josparly tártippen jol-patrýldik polıtsııasynyń qyzmetkerleri jabdyqtalýda.
«Atap ótilgen máselelerdiń negizinde, jol-patrýldik polıtsııasynyń jumysynda taıaqshalardy qoldanýdy orynsyz dep uıǵaramyn», - dep jaýap qaıtarǵan B. Saǵyntaev depýtattyq saýalǵa.
Esterińizge sala keteıik, 2017 jyldyń 1 qańtarynan bastap qazaqstandyq polıtseıler ala taıaqtan bas tartqan bolatyn. Barlyq jınalǵan taıaqshalar búginde saqtaý qoımalaryna jiberildi.
Budan buryn bıylǵy mamyrda QR Parlamenti Májilisiniń bir top depýtaty jol-patrýldik qyzmeti qyzmetkerlerine ala taıaqtardy paıdalaný jaǵdaıy men tártibin qaıta qaraýǵa usynys bildirgen bolatyn.
