Saǵyntaev Jezqazǵan óńirinde kásipkerlikti damytý barysymen tanysty
ASTANA. QazAqparat - Búgin Qaraǵandy oblysyna jumys sapary aıasynda QR Premer-Mınıstri Baqytjan Saǵyntaev Sátbaev qalasyndaǵy «Haným» makaron ónimderin shyǵaratyn kásiporyndy aralaý barysynda óńirde ShOB-ty damytý qarqynymen, sondaı-aq Ónimdi jumyspen qamtý jáne jappaı kásipkerlikti damytý baǵdarlamasyn iske asyrý barysymen tanysty, dep habarlaıdy primeminister.kz saıty.
Qaraǵandy oblysy ákiminiń orynbasary Almas Aıdarov óńirdegi kásipkerlikti damytý boıynsha atqarylyp jatqan jumystar týraly baıandady. Óńirde Ónimdi jumyspen qamtý jáne jappaı kásipkerlikti damytý baǵdarlamasy boıynsha 65 joba qoldaýǵa ıe boldy. Budan ózge, «Bıznestiń jol kartasy - 2020» baǵdarlamasy aıasynda qarjylyq qoldaý sharalarymen 33 joba qamtyldy.
Basymdyqty salalarda bıznesti sýbsıdııalaý úshin jergilikti bıýdjetten qosymsha 500 mln teńge bólinedi. Mundaǵy bıznes júrgizýge bolatyn áleýetti salalar - azyq-túlik óndirisi, ónerkásip, týrızm sektory jáne qyzmet kórsetý salalary. Maqsat - taýarlar óndirisi men qyzmet kórsetý kólemin eki esege arttyrý.
«Haným» makaron ónimderin shyǵaratyn tsehyn tekserý barysynda kásiporyn basshysy M. Jaǵyparov jobanyń qýattylyǵy - saǵatyna 200 kg, jylyna - 3000 tonna makaron ónimderin quraıtynyn málimdedi. Alty aıda 5,5 tonna ónim shyǵarylǵan.
Kásiporyn ótken jyldyń qyrkúıek aıynda paıdalanýǵa berildi. Jobany iske asyrý ımportty almastyrýǵa, sondaı-aq Jezqazǵan óńiriniń ekonomıkasyn ártaraptandyrýǵa yqpal etedi. Qazirgi tańda ónimder Jezqazǵan, Sátpaev jáne Ulytaý dúkenderi men sýpermarketterine jetkiziledi. Keleshekte makaronnyń jańa túrlerin shyǵarý, kásiporynnyń óndiristik qýatyn arttyrý, sondaı-aq Qazaqstanda jáne shetelde ótkizý naryǵyn keńeıtý kózdelgen.
