Saǵyntaev jekeshelendirýdiń jemisin qashan kóretinimizdi aıtty

ASTANA. QazAqparat - Jekeshelendirý tıimdiligi kvazımemlekettik sektordyń iri strategııalyq kompanııalary ІRO-ǵa shyqqannan keıin  ǵana bolady.  Bul týraly búgin QR Parlamenti palatalarynyń birlesken otyrysynda depýtattardyń saýalyna jaýap bergen QR Úkimet basshysy Baqytjan Saǵyntaev  málim etti, dep habarlaıdy QazAqparat.

«Eger sandarǵa júginer bolsaq, 2015 jyly «Samuryq-Qazyna» qorynyń enshiles kompanııalary 600 bolatyn. Memleket basshysynyń tapsyrmasyna sáıkes jekeshelendirý bastalyp, olar qysqartyldy. 2016 jyly enshiles jáne táýeldi kompanııalar 400 boldy jáne osy jyldyń sońyna deıin bul san 320-ǵa deıin qysqarady. Bul protsedýra taıaý eki jyldyń ishinde júrgiziledi. Óıtkeni, jekeshelendirý baǵdarlamasy 2018 jáne 2019 jyldary jalǵasady. 2020 jylǵa qaraı biz bul protsesti aıaqtaýǵa tıispiz», - dedi Baqytjan Saǵyntaev.

Premer-Mınıstrdiń aıtýynsha, jekeshelendiriletin kompanııalardyń basym bóligi shaǵyn nysandar. Negizgi aktıvter iri strategııalyq kompanııalardyń qaramaǵynda jáne iri kompanııalardy ІRO-ǵa shyǵarý týraly sheshim qabyldanǵan. Atalǵan kompanııalar ІRO-ǵa shyqqannan keıin olardy basqarý tetikteri ózgerip strategııalyq ınvestorlar keledi. Mine sol kezde jekeshelendirýdiń tolyq tıimdiligi baıqalady.