Saǵyntaev jasyl jelekti, kóshetterdi kútip ustaýdy tapsyrdy
ALMATY. QazAqparat - Almaty ákimi Baqytjan Saǵyntaevtyń tóraǵalyǵymen ótken jumys keńesinde megapolıstegi kógaldandyrý men kóshetterdi kútip ustaýdyń ózekti máseleleri qaraldy, dep habarlaıdy QazAqparat tilshisi.
Almatyda bıylǵy kóktemde 50 myńnan astam aǵash otyrǵyzyldy. Jaqyn arada taǵy 15 myńǵa jýyq kóshet otyrǵyzylady. Jalpy, bıyl kúzgi maýsymda Jasyl Almaty baǵdarlamasy aıasynda qalanyń jasyl qoryn 290 myń aǵashqa kóbeıtý josparda.
Mysaly, qala ákimi Baqytjan Saǵyntaevtyń jumys saparynyń birinde aıtylǵan ári Alataý aýdanynyń «Nurkent» jáne «Aqbulaq» shaǵyn aýdandary turǵyndarynyń tilekterine saı Rysqulov dańǵyly boıyndaǵy bólý jolaǵy kógaldandyrylady, munda 650 qaraǵash otyrǵyzyldy.
Jetisý aýdanynyń «Kókjıek» shaǵyn aýdanynda 8 450 aǵash otyrǵyzyldy, onyń ishinde pıramıdaly terek, kúmis terek, sondaı-aq jemis aǵashtary – «altyn keremet», «amerıkanka», «lımonka» syndy alma aǵashtary men Nıkıtınskıı órigi.
«Jasyl aýla» aktsııasy aıasynda 109 mekenjaı turǵyndaryna 1500 japyraqty kóshet taratyldy.
Keńes barysynda Almaty ákimi Baqytjan Saǵyntaev jasyl jelekterdi kútip ustaýǵa baqylaýdy kúsheıtýdi, kóshetter men burynnan bar aǵashtardy, sondaı-aq gúlzarlar men gazondardy sýarýdy tapsyrdy.
Qala ákiminiń tapsyrmasy boıynsha ótken jyldan bastap aýmaqtardy kógaldandyrý kezinde gúlderdiń kópjyldyq túrlerine basa nazar aýdaryldy. Bıylǵy kóktemde gúlzarlar men klýmbalardy jasaǵanda kópjyldyq ósimdikterdiń jalpy alańy 42% -ǵa jetkizildi, bul ótken jylmen salystyrǵanda 30% -ǵa artyq. Keler jyly kópjyldyq ósimdikterdiń úlesin 55%-ǵa deıin arttyrý josparlanýda.
Megapolıs basshysy qalalyq keńistikti kógaldandyrý kezinde landshaftty dızaın jónindegi mamandardyń usynysyn eskerý qajettigine nazar aýdardy.
