Saǵyntaev vızalyq jáne mıgratsııalyq tártipti jaqsartý boıynsha sharalar qabyldaýdy tapsyrdy
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaevtyń tóraǵalyǵymen Qazaqstanda vızalyq jáne kóshi-qon tártibin odan ári jaqsartý boıynsha keńes ótti.
Bul týraly primeminister.kz saıtynda habarlandy.
Keńes barysynda vızalyq jáne mıgratsııalyq retteýdi jeńildetý, vızalardy berý merzimin qysqartý, sonymen qatar elektrondy vızalardy engizý jáne sheteldik azamattardy tirkeý máseleleri talqylandy.
Atalǵan sharalar Qazaqstandaǵy ınvestıtsııalyq ahýaldyń jaqsarýyna jáne elimizge tikeleı sheteldik ınvestıtsııalardy tartýǵa yqpalyn tıgizetin bolady.
Keńes qorytyndysy boıynsha QR Premer-Mınıstri B.Saǵyntaev óziniń birinshi orynbasary Asqar Mamınge mıgratsııalyq jáne vızalyq saıasatty odan ári jetildirý boıynsha naqty sheshimder shyǵarý úshin qajetti sharalar qabyldaý jóninde tapsyrmalar berdi.
Anyqtama úshin: 2015 jyly Qazaqstanda aldyńǵy qatarly 19 eldiń: Avstralııa, Belgııa, Ulybrıtanııa, Germanııa, Italııa, Ispanııa, Nıderlandy, Norvegııa, Shvetsııa, Fınlıandııa, Frantsııa, Japonııa, AQSh jáne basqa da elderdiń azamattary úshin 15 kúndik vızasyz tártip engizilgen bolatyn. 2017 jyldyń 1 qańtarynan bastap Qazaqstanda sonymen qatar EYDU elderi, sondaı-aq BAÁ, Malaızııa, Sıngapýr men Monako úshin vızasyz tártip ornatylady.
