Saǵyntaev -Úkimetke: Sizderden qatań suralatyn bolady!
ASTANA. QazAqparat - QR Premer-Mınıstri Baqytjan Saǵyntaev memlekettik organdarǵa formalızmnen arylyp, qoıylǵan tapsyrmalardy naqty sheshýdi júktedi.
"Memleket basshysy belgilegen baǵyttardy merziminde júzege asyrýdyń naqty algorıtmi bolýy shart. Jaýapty tulǵalar da bolýy tıis. Sizderden qatań suralatyn bolady", - dedi Baqytjan Saǵyntaev Úkimet otyrysy barysynda.
Mınıstrler kabınetiniń basshysy óziniń orynbasarlaryna Memleket basshysynyń barlyq tapsyrmalaryn oryndaý barysy boıynsha tyńdaýlardy ótkizip otyrýdy tapsyrdy.
"10 qyrkúıekte men aımaq ákimderimen kezdesý ótkizdim. Osy kezdesý qorytyndysy boıynsha, men aımaq máselelerin aı saıyn úkimette qaraýdy tapsyrdym. Osy oraıda, memlekettik organdar óz jumystaryn túbegeıli qaıta qaraıtyn bolsyn. Formalızmnen arylyp, ákimder qoıǵan máselelerdi naqty sheshýdi tapsyramyn. Mysaly, ákimder áleýmettik mazýt pen kommertsııalyq astyq máselesin sheshýdi surady. Qazir bul saýal sheshimin tapty", - dedi ol.
