Saǵyntaev Úkimet múshelerine naqty tapsyrmalar berdi
ASTANA. QazAqparat - Búgin Úkimettiń selektorlyq rejimdegi otyrysynda Premer-Mınıstr Baqytjan Saǵyntaev mınıstrler kabıneti múshelerine birqatar tapsyrma berdi, dep habarlaıdy QazAqparat.
Úkimet basshysy eń aldymen penıtentsınarlyq mekemelerdiń qurylysyna jáne olardy jańǵyrtýǵa ınvestorlar tartý úshin Іshki ister mınıstrligine Ulttyq ekonomıka jáne Qarjy mınıstrlikterimen birlesip, bir aptanyń ishinde atalǵan mekemelerde oryn alyp otyrǵan jaǵdaıdy saralaýdy tapsyrdy. Sonymen qatar atalǵan merzim ishinde Іshki ister mınıstrligi memlekettik-jekeshilik seriktestik tetikteri arqyly penıtentsınarlyq mekemelerdi jańǵyrtý boıynsha naqty sheshimder ázirleýi tıis.
«Bir aıdan keıin biz Memleket basshysy aldynda esep berýge tıispiz. Asqar Uzaqbaıuly (Premer-Mınıstrdiń birinshi orynbasary Mámın) baqylaýǵa alyńyz», - dedi Saǵyntaev.
Sonymen qatar Úkimet basshysy Qarjy mınıstri Baqyt Sultanovqa «Astana-1» ilki aqparattyq júıesin barlyq modýlderimen synaqtan ótkizýge tapsyrma berdi.
«2018 jyldyń basynan ol irkilissiz jumys isteýi tıis. Sonymen birge jańa Keden kodeksi oryndalýy barysynda bızneske problema týyndatpaýy úshin ony júzege asyrý boıynsha zańnamalyq aktiler ázirleý qajet. Asqar Uzaqbaıuly muny da baqylaýda ustańyz. Salyq kodeksi boıynsha Memleket basshysyna baıandadyq. Qyrkúıekte Májiliske engizemiz. Tımýr Muratuly (Ulttyq ekonomıka mınıstri Súleımenov - red.) jobany ázirlep, barlyq eskertýlerdi eskere otyryp qyrkúıekte Parlament Májilisine engizý kerek», - dedi Premer-Mınıstr.
Munan bólek Saǵyntaev Energetıka mınıstrligine Ulttyq ekonomıka mınıstrligimen birlesip, elimizdiń elektr taratý jelilerin úlkeıtý úderisin bastaýdy tapsyrdy.
«2018 jyldyń 1 toqsanynyń qorytyndysy boıynsha júrgizilgen jumystar jaıynda esep berilsin. Sonymen qatar Ulttyq ekonomıka mınıstrligine ákimderimen birlesip ıesiz elektr jelilerine túgendeý júrgizýdi jáne 20 qazanǵa deıin olardy ákimdikterdiń balansyna berý boıynsha tyńǵylyqty jospardy usynýdy tapsyramyn», - dedi ol.
