Saǵyntaev Úkimet atynan Shahan men Shymkentte apat saldarynan qaza tapqandardyń otbasyna kóńil aıtty
ASTANA. QazAqparat - Búgin Úkimettiń selektorlyq rejimdegi otyrysy barysynda QR Premer-Mınıstri Baqytjan Saǵyntaev Shahan kenti men Shymkent qalasynda turǵyn úı apatynan qaza tapqandardyń otbasylaryna kóńil aıtty, dep habarlaıdy QazAqparat.
«Ókinishke oraı Jańa jyldyq mereke kúnderi birqatar óńirde tótenshe jaǵdaılar oryn aldy. Shahtınsk qalasynyń Shahan kentinde jylý qazany jarylyp, 5 qabatty úıdiń bir jaǵy túgel qulap qaldy. Keshe Jezqazǵan qalasynda jylý ortalyǵy toqtap qalyp, qala turǵyndary men óndiristik nysandarǵa elektr men jylý qýaty berilmedi», - dep atap ótti Úkimet basshysy.
Osy rette Premer-Mınıstr shuǵyl qabyldanǵan sheshimderdiń nátıjesinde Jezqazǵanda jumys qaıta jandanyp, jylý men elektr jaryǵy ýaqytynda halyqqa da, ónndiristik nysandarǵa da tolyǵymen jetkizilgenin atap ótti.
«Sonymen qatar tótenshe jaǵdaı jýyrda Shymkent qalasynda da oryn aldy. Ókinishke oraı birneshe adam qurban boldy. Úkimet atynan qaza bolǵandardyń týǵan-týystary men jaqyndaryna kóńil aıtamyn», - dedi Saǵyntaev.
Eske sala ketsek, 1 qańtar kúni 22 saǵat 40 mınýt shamasynda Qaraǵandy oblysynyń Tótenshe jaǵdaılar departamentine Shahan kentinde kópqabatty úıdiń qulaǵany jóninde arnaıy habar kelip túsken. Qıraǵan úıdiń úıindilerinen 9 adamnyń máıiti tabyldy. Olardyń 3-ýi er adam, 3-ýi áıel adam, taǵy úsheýi balalar. Úıdiń qulaýyna 4-shi podezdiń jertólesinde ornalasqan qazandyqtyń jarylýy sebep.
Shymkent qalasyndaǵy qaıǵyly oqıǵa 8 qańtarǵa qaraǵan túni boldy. Halyqtar dostyǵy kóshesinde ornalasqan eki qabatty turǵyn úıde gaz ballony jarylyp, baspana opyrylyp qulaǵan bolatyn. Saldarynan 1988 jyly týǵan Sabına Orynbaeva qaza boldy. Taǵy tórt adam zardap shekti: Qarlyǵash Axanova 1996 jyly týǵan (2 dárejeli kúıik jaraqaty), Ásııa Orynbaeva 1957 jyly týǵan (dene jaraqaty), Dáýren Jumalıev 1985 jyly týǵan (dene jaraqaty), Arýjan Daýylbaı 2015 jyly týǵan (dene jaraqaty). Aldyn ala boljamǵa sáıkes, úıdiń qulaýy gaz-aýa qospasynyń jarylysynan bolǵan.
