Saǵyntaev tyńaıtqyshtarmen qamtamasyz etý baǵytynda birqatar tapsyrmalar júktedi
ASTANA. QazAqparat - Búgin Úkimet otyrysynda QR Premer-Mınıstri Baqytjan Saǵyntaev aýyl sharýashylyǵy taýarlaryn óndirýshilerdi tyńaıtqyshtarmen qamtamasyz etý baǵytynda birqatar tapsyrmalar júktedi, dep habarlaıdy QazAqparat.
«Ártaraptandyrý baǵytyndaǵy qadamdar oryndalyp jatqanyn baıqap otyrmyz. Bul turǵyda Soltústik Qazaqstan oblysynyń ońtaıly tájirıbesi týraly aıtyldy. Óńirlerge sapar barysynda aýyl sharýyshylyǵy taýarlaryn óndirýshiler mıneraldyq tyńaıtqyshtar kólemin arttyrý máselesin kótergen bolatyn. Sondyqtan osy taqyrypty bizdiń baǵdarlamalar aıasynda bólek qarastyrǵan edik. Jeńis Mahmuduly, (QR Investıtsııalar jáne damý mınıstri) mıneraldy tyńaıtqyshtardy tolyq kólemde óndirip, sharýashylyqtarǵa jetkizip berýge qoldaý jasaý kerek»,-dep tapsyrdy Úkimet basshysy.
Sonymen qatar Saǵyntaev tyńaıtqyshtardy óndirý kólemin arttyrý boıynsha aldaǵy jylǵa jospardy qarastyrý qajettigin atap ótti.
Óz kezeginde QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov bıylǵy jylǵy kóktemniń ereksheligine qaramastan, kóktemgi egis jumystary mejelegen merzimde ótkizilgenin jetkizdi.
«Jalpy salada aǵymdaǵy jyly júıeli sharalardy iske asyra aldyq. Bárinen buryn elıtalyq tuqym óndirisi qalpyna keltirildi. Osy oraıda tuqym sharýashylyǵyn qoldaýǵa qarjylandyrý kólemi aıtarlyqtaı artty. Sonymen qatar mıneraldy tyńaıtqyshtardy qoldaný deńgeıi 1,5 esege joǵarylady»,-dedi Asqar Myrzahmetov.
QR AShM málimetine qaraǵanda, sýbsıdııalanatyn tyńaıtqyshtardyń assortımenti 2016 jylǵy 85-ten 2017 jyly 161-ge deıin artty. Sýbsıdııa tetikterin qaıta qaraý nátıjesinde tyǵńaıtqyshtardy engizý kólemi 1,5 esege ulǵaıdy.
