Saǵyntaev turǵyndarmen birge asfalt pen jaryq joq kóshelerdi aralady
ALMATY. QazAqparat –Almaty ákimi Baqytjan Saǵyntaev Alataý aýdany ákiminiń eseptik kezdesýine qatysty, dep habarlaıdy QazAqparat tilshisi.
Aýdan turǵyndaryn alańdatatyn basty máseleler – joldyń, kommýnaldyq jelilerdiń joqtyǵy, abattandyrý men aýmaqty kógaldandyrý jumystary.
Alataý aýdanynyń ákimi Azamat Qaldybekov turǵyndarǵa 2019 jyly atqarylǵan jumystardy baıandap berdi.
Ótken jyly «Mádenıet» yqshamaýdany men «Energostroıtel», «Teploenergetık» saıabaqtaryna 6,8 shaqyrym gaz qubyry tartyldy. 1407 úıdi gazdandyrý qajet, olardyń 976-y jeke úı, 431-i saıabaq.
Sýmen qamtý 79% káriz jelileri 68 % – dy quraıdy. «Aqbulaq», «AZTM», «Alǵabas» yqshamaýdandaryna uzyndyǵy 107 shaqyrym bolatyn jeliler tartylyp jatyr.
Aýdan elektr jelisimen tolyq qamtylǵan. Degenmen, 157 shaqyrym jeli men transformatorly qosalqy stansalar sot arqyly ıesiz dep tanylyp, onyń 143 shaqyrymy «Alataý Jaryq» kompanııasynyń balansyna berildi. Aıta keterligi, aýdan turǵyndary kommýnaldyq qyzmet tólemin jalpyqalalyq tarıf boıynsha tóleı alady.
Eseptik kezdesý barysynda turǵyndar tarapynan usynys– tilekter de aıtyldy. Máselen, ekolog Tımýr Eleýsizov skverlerdi abattandyrý boıynsha kómegin usyndy, sonymen qatar vıdeobaqylaý kameralaryn ornatý qajet ekenin atap ótti.
Almaty ákimi Baqytjan Saǵyntaev Alataý aýdany turǵyndarynyń suraqtaryna jaýap berdi. Barlyq problemalyq máselelerdiń júıeli túrde sheshiletinin habarlady. Ol úshin taıaý ýaqytta aýdandar ákimderi óz aýmaqtaryn damytýdyń úsh jyldyq sheberlik-josparlaryn ázirleıtin bolady.
«Mundaı ınfraqurylymdy jaqsartatyn jáne aýdannyń basqa da máselelerin sheshetin «Jol kartasy» sizderdiń belsendi qatysýlaryńyz arqyly ázirlenedi. Qala bıýdjeti sheberlik-josparlaryna sáıkes jasalady ári bólinetin bolady», — dedi B. Saǵyntaev. Ol ákimdiktiń jumysynda turǵyndar pikirleriniń basty nazarǵa alynatynyn atap ótti.
Kezdesý aıaqtalǵan soń aýdan turǵyny Jumaǵazy Esjanovtyń ótinishi boıynsha Almaty ákimi asfalty, jaryǵy joq, aryq júıesi buzylǵan Dospanov pen Suhambaev kósheleriniń qıylysyna bardy. Mundaǵy aǵashtardy kesý qajet, óıtkeni olardyń butaqtary elektr jelisi men baılanysqa zııan keltirýi múmkin ekendigi aıtyldy.
Baqytjan Saǵyntaev tıisti basqarmalar basshylaryna jumys josparlaryna saı kórsetilgen kemshilikterdi joıýdy tapsyrdy.
Aıtar bolsaq, ótinishterge jedel nazar aýdarý úshin Alataý aýdanynda Whatsapp messendjerinde +7 700 300 2097 nómiri boıynsha chat ashylǵan.
