Saǵyntaev turalap qalǵan kásiporyndardy iske qosýdy tapsyrdy
ASTANA. QazAqparat -Búgin Úkimet otyrysynda Premer-Mınıstr Baqytjan Saǵyntaev Indýstrııalandyrý kartasyna engizilgen, alaıda búginde turalap qalǵan kásiporyndardyń jumysyn jandandyrýdy tapsyrdy, dep habarlaıdy QazAqparat.
«Indýstrıaldy-ınnovatsııalyq damýdyń memlekettik baǵdarlamasy boıynsha Memleket basshysy baǵdarlamanyń tıimdiligin jańa tehnologııalar men tsıfrlandyrýdy engizý esebinen arttyrý qajettigin atap ótti. Osyǵan baılanysty Investıtsııalar jáne damý mınıstrligi ákimdiktermen, sondaı-aq múddeli uıymdarmen birlese eksporttyq óndiristerdiń básekege qabilettigin damytý jónindegi jumysty úılestirý qajet», - dep tapsyrdy Úkimet basshysy.
Sonymen qatar B. Saǵyntaev QR Prezıdenti óńirlik Indýstrııalandyrý kartasy aıasynda engizilgen, alaıda toqtap qalǵan jobalarǵa nazar aýdarǵanyn atap ótti.
«Búginge osyndaı 15 joba bar. Bıylǵy 1 tamyzdaǵy jaǵdaı boıynsha, tórt joba Qostanaı oblysynda, eki jobadan Aqmola, Aqtóbe, Shyǵys Qazaqstan, Pavlodar oblystarynda, sondaı-aq bir jobadan Atyraý, Batys Qazaqstan jáne Soltústik Qazaqstan oblystarynda turalap qalǵan. Atalǵan óńirlerdiń ákimderi árbir kásiporynmen tıisti jumystardy júrgizýi tıis. Olardyń toqtap turý sebepterin tyńǵylyqty anyqtaý kerek jáne óndiristerdi iske qosý turǵysynda birlesken sharalardy qabyldaý qajet. Jergilikti jerlerde qoldaý jasaýdyń barlyq tetikteri bar, sondyqtan da 1 jeltoqsanǵa deıin toqtap turǵan barlyq kásiporyndardyń qyzmetin jandandyrýdy qamtamasyz etý kerek. Meniń oıymsha, atalǵan kásiporyndardaǵy jaǵdaıdy sizder bilesizder. Osy oraıda máseleniń tıisti sheshimi bolady dep paıymdaımyn»,-dedi B. Saǵyntaev óńir ákimderine qaratyp aıtqan sózinde.
