Saǵyntaev Taldyqorǵan aýrýhanasyndaǵy maman tapshylyǵyna nazar aýdardy
TALDYQORǴAN. QazAqparat - Almaty oblysyna issaparmen kelgen Premer-Mınıstr Baqytjan Saǵyntaev óńirdegi medıtsına salasy mamandarynyń tapshylyǵyna nazar aýdardy, dep habarlaıdy QazAqparat tilshisi.
Úkimet basshysy oblys ortalyǵynda byltyr paıdalanýǵa berilgen kópsalaly aýrýhanany aralaý barysynda MRT (magnıtti-rezonansty tomografııa) apparatynda eki dáriger ǵana jumys istep otyrǵanyn bildi. Al naýqas bul apparatqa túsý úshin keminde bir apta boıy kezek kútýi tıis. Bul jóninde atalǵan mekemeniń basshylyǵy Baqytjan Saǵyntaevqa ózderi aıtyp bergen. Úkimet basshysy mundaı joldan shyǵýdaǵy óz oıyn bildirdi. Premer-Mınıstr bul olqylyqty jekemenshik medıtsına úlesin arttyrý arqyly túzetýge bolatynyn jetkizdi. Onyń paıymynsha, jekemenshik medıtsınadaǵylar maman joq dep qol qýsyryp otyrmaıdy. Tyǵyryqtan shyǵýdyń jolyn tabady.
Aıta ketý kerek, búginde Almaty oblysynyń medıtsına salasynda 170-ten asa dáriger mamany jetispeıdi. Qazir eki mıllıon turǵyny bar óńirde 2 gepatolog dáriger ǵana jumys isteıdi.
