Saǵyntaev Shymkentte ońtústik halqyn soltústikke kóshirý máselesin kóterdi
ShYMKENT. QazAqparat - Búgin Shymkenttegi «Kórme» ortalyǵynda óńirge saparmen kelgen QR Premer-Mınıstri Baqytjan Saǵyntaevtyń tóraǵalyǵymen týrızm jáne kásipkerlik salalarynyń damýy máseleleri boıynsha jıyn ótti, dep habarlaıdy QazAqparat HAA tilshisi.
Otyrysqa elimizdiń birqatar mınıstrleri men Astana jáne Almaty qalalarynyń, soltústik oblystary ákimderiniń orynbasarlary, aýdan-qala ákimderi men basqarma jetekshileri qatysty.
Jıynda alǵash sóz alǵan Úkimet basshysy Baqytjan Saǵyntaev ońtústik óńirinde kásipkerlikti damytý baǵytynda atqarylyp jatqan jumystarmen tanysyp, ataalǵan salany qoldaý máselesin atap ótti.
«Ońtústiktiń halqy isker, olardy úıretýdiń qajeti joq. Tek qana jumystyń jobasyn kórsetseń, ózderi alyp ketedi. Oblystyń ózin-ózi qamtamasyz etýge múmkindigi joǵary. Baý-baqshany damytý salasy boıynsha da sharýany alǵa qaraı alyp kete alady. Kásipkerlikti damytý úshin berilip jatqan kómekter jetkilikti ma, qosymsha zańdardy qaıta qarastyryp, sol arqyly kómek qajet pa, sol jaǵyn qarastyrýymyz kerek», - dedi Premer-Mınıstri Baqytjan Saǵyntaev.
Sondaı-aq, Úkimet basshysy ońtústik halqynyń soltústik oblystaryna kóshý máselesine de toqtaldy. Bul baǵytta júıeli jumystardyń atqarylý barysyn sóz etken Baqytjan Saǵyntaev kóship barǵan azamattarǵa jer berý, olardy turaqty jumyspen, baspanamen qamtý qajettigin atap ótti. Ásirese, iskerlik qabileti joǵary sharýalar men kásipkerlerdi jiberý kerektigin tilge tıek etti.
«Ońtústikte jer jetpese, soltústikte jer kóp. Eńbek etip tirlik jasaımyn degenderge múmkindikter de kóp. Kásipkerlerge aıtarym, soltústikten kásip ashyp, bıznes ashýǵa bolady. Jastar onda baryp, kásiptik joǵary bilim alǵanymen aýyldaryna qaıtqysy kelip turady. Al, eseıgen adam sanasymen ketip bara jatqan soń, ornyǵyp eńbek etýge áreket etedi. Sondyqtan kásipkerlerdi de jiberý kerek», - dedi Úkimet basshysy.
Premer-Mınıstr bul rette jıynǵa qatysqan Shyǵys Qazaqstan, Qostanaı, Pavlodar jáne Soltústik Qazaqstan oblystarynan kelgen ákimdik qyzmetkerlerinen ońtústikten soltústikke kóship barǵandardyń búgingi jaǵdaıy men taǵy qandaı kómekter qajettigin surady.
