Saǵyntaev «Shymkent Sity» qalashyǵynyń qurylysymen tanysty
ShYMKENT. QazAqparat - QR Premer-Mınıstri Baqytjan Saǵyntaev Ońtústik Qazaqstan oblysyna sapary barysynda Shymkentte salynyp jatqan «Shymkent Sity» qalashyǵynyń qurylys barysymen tanysty. 427 gektar jerde ornalasatyn jańa qalashyqty salý jumystary eki jyl buryn bastalǵan, dep habarlaıdy QazAqparat tilshisi.
Qurylys júrgizetin kompanııalardyń ókilderi Úkimet basshysyn jańadan salynatyn nysandardyń jobalarymen tanystyrdy. Jospar boıynsha qalashyqta kópqabatty 324 turǵyn úı, 7 mektep, 23 balabaqsha ornalasady. Sondaı-aq saıabaqtar, sport keshenderi men mádenıet ǵımarattary boı kóteretin bolady.
Búginde atalǵan aýmaqta ınjenerlik-kommýnıkatsııalyq ınfraqurylymnyń, 31 turǵyn úıdiń jáne 1 200 oryndyq mekteptiń qurylysy bastalǵan. Ústimizdegi jyly jalpy aýmaǵy 30,2 myń sharshy metr bolatyn kópqabatty 10 turǵyn úı paıdalanýǵa berilmek. 9 nysannan turatyn kópqabatty 21 úı jáne 1 mekteptiń qurylysy 2019 jyly aıaqtalady.
Aıta keteıik, bıyl óńirde «Nurly jer» baǵdarlamasy aıasynda jalpy aýmaǵy 730 myń sharshy metr bolatyn, 6 615 páterdi paıdalanýǵa berý josparlanyp otyr. Qazirgi tańda 236 kópqabatty úıdiń qurylysy júrgizilýde.
Sonymen qatar, oblys eldi mekenderinde mamandarǵa arnalǵan ekiqabatty 31 qyzmettik turǵyn úı tapsyrylatyny josparlanǵan.
