Saǵyntaev ShQO jurtshylyǵymen óńirdiń áleýmettik-ekonomıkalyq damý máselelerin talqylady
ASTANA. QazAqparat - QR Premer-Mınıstri Baqytjan Saǵyntaev Shyǵys Qazaqstan oblysyna jumys sapary aıasynda Semeı qalasynyń jurtshylyǵymen kezdesý ótkizdi. Jıynda óńirdiń áleýmettik-ekonomıkalyq damýynyń ózekti máseleleri talqylandy.
Baqytjan Saǵyntaev kezdesý qatysýshylaryna elimizde júrgizilip jatqan Konstıtýtsııalyq reformalardyń mánin túsindirip, Úkimettiń QR Prezıdentiniń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýyn iske asyrý boıynsha atqaryp jatqan jumystary týraly aıtty, dep habarlady QR Úkimetiniń saıty .
QR Premer-Mınıstri ekonomıkalyq ósimniń jańa úlgisin qalyptastyrý úshin Úkimet óz jumysyn 5 mańyzdy basymdyqqa jumyldyratynyn aıtty, sonyń ishinde - jappaı kásipkerlikti damytý, óndiristik jumyspen qamtýdy arttyrý, tehnologııalyq jańartý jáne ekonomıkany tsıfrlandyrý, qarjylyq turaqtylyqpen qamtamasyz etý jáne salalyq baǵdarlamalardy iske asyrý bar.
Kezdesý qatysýshylary óńirdiń ózekti máselelerin talqylap, ShQO-nyń odan ári áleýmettik-ekonomıkalyq damýy jónindegi óz usynystaryn aıtty.
Keńes barysynda turǵyn-úı qurylysy, aýyl sharýashylyǵyn damytý, densaýlyq saqtaý salasyna memlekettik qoldaý kórsetý, kásibı-tehnıkalyq bilim berýdi damytý jáne bilim berýdiń úshtildilik júıesin engizý máseleleri qozǵaldy.
Jalpy, qala jurtshylyǵy júrgizilip jatqan Konstıtýtsııalyq reforma men QR Prezıdentiniń Joldaýynda atalǵan mindetterge qoldaý kórsetetinderin bildirdi.
Jurtshylyqpen kezdesý aıasynda Semeı qalasynyń ákimi Ermak Sálimov, qalalyq ardagerler keńesiniń tóraǵasy Amantaı Doǵalaqov, «Sát trans» JShS dırektory Nurlan Baıbekov, elektr tehnıkalyq kolledjiniń dırektory Azat Sarpekov, Semeı q. №7 mektep-lıtseıiniń aǵylshyn tili muǵalimi Marına Ýstıýjanınova, «Qazaq tili» halyqaralyq qoǵamynyń vıtse-prezıdenti Oral Sháripbaev, qalalyq ardagerler keńesiniń músheleri Nasen Sembaev pen Dúısen Sultanov sóz sóıledi.
Kezdesý qorytyndysy boıynsha QR Premer-Mınıstri Baqytjan Saǵyntaev oblys pen qala basshylyǵyna óńirdi odan ári áleýmettik-ekonomıkalyq damytý máseleleri jóninde birqatar naqty tapsyrmalar berdi.
