Saǵyntaev ShQO-da baspananyń qoljetimdiligin arttyrý jumystarymen tanysty
Memleket basshysy N. Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty halyqqa Joldaýynda ómir súrýge jaıly orta qalyptastyrýdyń negizgi faktorlarynyń biri retinde sapaly ári qoljetimdi turǵyn úıdiń bolýyn atap ótti.
Semeı qalasynda salynyp jatqan «Qaraǵaıly» shaǵyn aýdanynyń mysalynda Baqytjan Saǵyntaev Memleket basshysynyń Shyǵys Qazaqstan oblysyndaǵy turǵyn úı qurylysy boıynsha bergen tapsyrmalarynyń oryndalý barysymen tanysty. «Nurly jer» baǵdarlamasy aıasynda boı kóterip jatqan shaǵyn aýdan qalanyń oń jaǵalaýynyń soltústik bóliginde, ekologııalyq taza aýmaqta salynýda. Barlyǵy 200 myń gektar aýmaqta 787 myń sharshy metr turǵyn úıdiń qurylysy júrgiziledi. Premer-Mınıstrge 25 myńnan astam adamdy baspanamen qamtamasyz etetin «Aqsaı» turǵyn úı alaby josparynyń jobasy tanystyryldy.
Aıta ketý kerek, munda Elbasy alǵa qoıǵan mindetterdi eskergende, áleýmettik ınfraqurylym nysandary da salynbaq. 1200 oryndyq eki jalpy bilim beretin mektep, 370 oryndyq úsh balabaqsha, 150 orynǵa shaqtalǵan balalardy ońaltý ortalyǵy, dene shynyqtyrý-saýyqtyrý kesheni jáne t.b. salynatyny kózdelgen. «Abaı Arena» mádenı-sport kesheniniń jobasy sport zaly, 5 myń kórermen orny bar úsh qabatty ǵımarat túrinde jasalǵan. Keshende basseınder men túrli sport túrlerimen aınalysýǵa arnalǵan bólmeler bolady.
Sonymen qatar, oblys ákimi D. Ahmetov «Nurly jer» baǵdarlamasyn iske asyrý aıasyndaǵy óńirdiń basqa da ınfraqurylymdyq jobalary týraly baıandady. Qazirgi tańda Shyǵys Qazaqstan oblysynda qarjylandyrýdyń barlyq kózderi esebinen turǵyn úı qurylysyna 18,6 mlrd teńge ınvestıtsııa baǵyttalǵan. 195,1 myń sharshy metr nemese 1823 turǵyn úı paıdalanýǵa berildi, onyń 629-y - jeke turǵyn úıler. 2018 jyly baspanany paıdalanýǵa berý jospary 8% ósip, 410,5 myń sharshy metrdi qurady. Budan ári kólemder ulǵaıtylmaq - 2021 jyly 517,1 myń sharshy metrdi quraıdy. Alǵa qoıylǵan maqsattarǵa jetý úshin, oblysta 2018-2020 jyldary 184 úı (15 905 páter) salý kózdelgen. Qazirgi tańda 81 kóppáterli turǵyn úı (6 497 páter) salynyp jatyr, onyń 45-in (3576 páter) bıyl paıdalanýǵa berý josparda bar. 2018 jyly ınjenerlik-kommýnıkatsııalyq ınfraqurylymdy júrgizýmen Óskemende 54 jeke úı (5,1 myń m²) jáne Semeıde 50 jeke úı (5 myń m²) qurylysy bastaldy.
Budan ózge, Premer-Mınıstr Qaraǵaıly turǵyn aýdanynyń mańynda 320 orynǵa arnalǵan balabaqshaǵa baryp, mektepke deıingi bilim berý sapasymen tanysty. Bul balabaqsha memlekettik-jekemenshik áriptestik aıasynda salynyp, bıyl tamyz aıynda aıaqtaldy. Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýynda ataǵan tapsyrmalaryn iske asyrý turǵysynan sapaly bilim berý qyzmetterin usynýǵa qajetti barlyq jaǵdaılar jasalǵan. B. Saǵyntaev balalardyń jan-jaqty damýyna baǵyttalǵan jańa bilim berý tehnologııalarymen tanysty. Sonymen qatar, tárbıeshiler ózderiniń kásibı qyzmetinde zııatkerlik damýdyń jańa úlgisine sáıkes keletin ádistemelik quraldardy, oqytýdyń tásilderi men amaldaryn qoldanatyn bolady.
