Saǵyntaev sertıfıkattaý týraly: Artyq qylamyz dep, tyrtyq qylamyz
ASTANA. QazAqparat - Azyq-túlik emes taýarlarǵa sertıfıkat berý qyzmeti memlekettik baqylaýǵa qaıta berilýi múmkin. Bul týraly búgin Úkimettiń selektorlyq rejimdegi otyrysynda Premer-Mınıstr Baqytjan Saǵyntaev aıtty, dep habarlaıdy QazAqparat tilshisi.
«Sertıfıkattardy zań buzýshylyqpen berip otyrǵan mekemeler negizinen bıznes salasynda. Ótken jyldyń jeltoqsan aıynda «Atameken UKP-nyń tóralqa jıynynda da aıtyp óttik. Kóp máselede bızneske jeńildik berdik jáne memlekettik qyzmetterdiń kópshiligin bıznestiń óz tarapynan júrgizýge múmkindik jasadyq», - dep atap ótti Úkimet basshysy.
Osy rette Baqytjan Saǵyntaev Azyq-túlik emes taýarlarǵa sertıfıkat beretin sýbektilerdiń qyzmetin qoǵamdyq uıymdar óz qadaǵalaýyna alýy tıistigin aıtty.
«Sertıfıkattaý máselesine qoǵamdyq uıymdar tarapynan baqylaý júrmese, memleket tarapynyń baqylaýy alynyp tastalatyn bolsa, onda Úkimet pen «Atameken» (ulttyq kásipkerler palatasy-avt) qaıtadan birlesip, qyzmetterdiń keıbir túrlerin memlekettik baqylaýǵa qaıtarýy qajet. Biz ony qazaqsha aıtqanda «artyq qylamyz dep, tyrtyq qylyp» otyrmyz. Osy máseleni qaraýymyz kerek. Shyndyǵyna kelgende keıbir máselelerde táýekelderdi basqarý júıesi jumys jasamaıdy», - dedi QR Premer-Mınıstri.
Aıta keteıik, búgingi otyrys barysynda «Atameken» ulttyq kásipkerler palatasynyń tóraǵasy Abylaı Myrzahmetov azyq-túlik emes taýarlarǵa sertıfıkat beretin sýbektilerge memlekettik baqylaýdy kúsheıtý qajettigin aıtqan bolatyn.
