Saǵyntaev Semeı qalasy áýejaıynyń qaıta jóndeý jumystarymen tanysty
Oblys ákiminiń orynbasary S. Aqtanov QR Premer-Mınıstri Baqytjan Saǵyntaevqa aerodromnyń qaıta qurý jumystarynyń barysy týraly aıtyp berdi. Onyń aıasynda ushyp-qoný jolaǵy 2,7 km-den 3,3 km-ge deıin uzartylatyn bolady, jańa apattan qutqarý stansasy turǵyzylady jáne kommýnıkatsııanyń barlyq túri almastyrylady. Budan ózge, B. Saǵyntaevqa áýejaıdyń qaýipsizdik júıesiniń jumystary týraly esep berildi.
Aıta ketý kerek, Semeı qalasynyń áýejaıy tranzıttik baǵdarlar úshin óte qolaıly geografııalyq jerde ornalasqan jáne qaıta qurý jumystarynan keıin júk laınerlerinen bastap, kez-kelgen ushaq túrlerin qabyldaı alatyn bolady. Búgingi tańda áýe aılaǵy jylyna shamamen 70 myń adamǵa qyzmet kórsetedi.
Úkimet basshysy budan keıin Semeıdegi JEO-1 mekemesin qaıta jóndeý jumystaryn tekseredi, «Nazarbaev zııatkerlik mektebiniń» bólimshesine barady, sonymen qatar óńirdiń áleýmettik-ekonomıkalyq damýynyń ózekti máselelerin talqylaý maqsatynda qala jurtshylyǵymen kezdesý ótkizedi.
Jumys sapary barysynda Premer-Mınıstr QR Prezıdentiniń «Qazaqstannyń úshinshi jańǵyrýy: jahandyq básekege qabilettilik» atty Joldaýynyń aımaqtaǵy iri ónerkásiptik-ındýstrıaldyq jáne aýyl sharýashylyǵy kásiporyndarynda, densaýlyq saqtaý jáne bilim berý nysandarynda júzege asyrylý barysymen tanysady.
Eske sala ketsek, keshe B.Saǵyntaev Aqtoǵaı taý-ken baıytý kombınatyna, Óskemen armatýra zaýytyna, Úlbi metallýrgııa zaýytyna, maıly daqyldar tájirıbelik sharýashylyǵyna, kóz mıkrohırýrgııasy emhanasyna jáne D. Serikbaev atyndaǵy Shyǵys Qazaqstan memlekettik tehnıkalyq ýnıversıtetine bardy.
