Saǵyntaev: Renovatsııa qala turǵyndarynyń ómir súrý sapasyn ońaltýǵa baǵyttalǵan
ALMATY. QazAqparat – Almaty ákimi Baqytjan Saǵyntaev renovatsııa jobalary týraly aıtty, dep habarlaıdy QazAqparat tilshisi.
Renovatsııa baǵdarlamasy boıynsha qaladaǵy eski úılerdi súrý jolymen «eski» aýmaqtar kesheni jańaryp, turǵyndar jańa úılerge kóshedi.
B. SaǵyntaevInstagram -daǵy paraqshasynda habarlaǵandaı, renovatsııa baǵdarlamasy myńdaǵan qala turǵyndarynyń ómir súrý sapasyn jaqsartýǵa jáne qurylys salasyna ınvestıtsııa tartýǵa baǵyttalǵan.
«Qalada 1444 eski úı bar. Sonyń 609-y Túrksib aýdanyna tıesili. Munda Almaty ákimdiginiń kúrdeli qurylys kásiporny 62 páterge arnalǵan 5 qabatty eki úı turǵyzdy. Úsh eski úıdiń (42 páter) ornyna ınvestorlardyń kúshimen 152 páterlik 7 úı boı kóteredi. Osıpenko kóshesinde 59 páterli eki úıdiń qurylysy bastalady. Sondaı-aq jeke ınvestordyń esebinen 30 eski eki qabatty úıdiń ornyna 1252 páterge arnalǵan 26 zamanaýı bes qabatty ǵımarat salý josparlanýda», - dep jazdy Almaty ákimi.
Almaty ákimdiginiń kúrdeli qurylys kásiporny Túrksib aýdanynda renovtsııa jobasyn Saýranbaev — Moldaǵalıev — Chernyshevskıı — Tolstoı kósheleri aýmaǵynda iske asyratyn bolady. Jeke ınvestor aýqymdy joba boıynsha jańa úılerdi osydan 60 jyl buryn salynǵan ekiqabatty eski úıler turǵan Seıfýllın dańǵyly — Aqan seri — Kassın — Kotelnıkov kósheleriniń aýmaǵynda salatyn bolady.
Sonymen qatar, Baqytjan Saǵyntaev Medeý aýdanynda 21 páterge arnalǵan eski úsh úıdiń ornynda 303 páterli 6 úıdiń qurylysy aıaqtalyp qalǵanyn atap ótti. Jetisý aýdanynda 70 páterli 8 eski úıdiń ornyna ınvestorlarmen birge 489 páterli 7 úıdiń qurylysyn bastaý josparlanǵan.
