Saǵyntaev polıtsııaǵa urlyq, buzaqylyq, tonaýǵa qarsy kúresti kúsheıtýdi tapsyrdy
ALMATY. QazAqparat - Almaty ákimi Baqytjan Saǵyntaev qalalyq Polıtsııa departamenti men qoǵamdyq keńes múshelerin jınap jıyn ótkizdi, dep habarlaıdy QazAqparat tilshisi.
«@dvd_galmaty jáne qoǵamdyq keńespen jıyn ótkizdim. Qylmysqa, krımınalǵa, esirtkige qarsy kúresýdiń, PPQ pen ýchaskelik pýnktterdiń jumysyn jańartýdyń joldaryn belgiledik. Almaty turǵyndar men qonaqtar úshin qaýipsiz qala bolýy tıis. Bul PD jumysyna berilgen baǵa», - dedi qala basshysy óziniń Twitter-degi paraqshasynda.
Onyń aıtýynsha, jınalǵandar keleńsiz jaıttardy jáne megapolıste qaýipsizdik pen quqyqtyq tártipti kúsheıtýdiń aldaǵy sharalaryn talqylaǵan.
«Urlyqqa, buzaqylyqqa, tonaýǵa jáne nashaqorlyqqa qarsy kúresti barynsha kúsheıtý qajet. Munda patrýldik polıtsııanyń jumysyn qaıta qarap, vıdeobaqylaý jelisin keńeıtken jón. Polıtsııa departamentine ýchaskelik pýnktterge tekserý júrgizýdi, modernızatsııa boıynsha usynys berýdi tapsyrdym. Polıtsııa jumysynyń basty kórsetkishi halyqtyń senimi bolýy tıis. Barlyq máseleler meniń jeke baqylaýymda»,- dedi ákim.
