Saǵyntaev pen DB vıtse-prezıdenti Qazaqstannyń tranzıttik áleýetin damytý máselesin talqylady
ASTANA. QazAqparat - Búgin Úkimet úıinde Qazaqstan Respýblıkasynyń Premer-Mınıstri Baqytjan Saǵyntaev Dúnıejúzilik banktiń Eýropa jáne Ortalyq Azııa óńiri boıynsha vıtse-prezıdenti Sırıl Mıýllermen kezdesý ótkizdi, dep habarlaıdy QR Úkimetiniń baspasóz qyzmeti.
Kezdesý barysynda Memleket basshysy N. Nazarbaevtyń «Qazaqstannyń úshinshi jańǵyrýy: jahandyq básekege qabilettilik» Joldaýy aıasynda Qazaqstanda ekonomıkanyń jańa modelin engizý máseleleri talqylandy.
Eki tarap ekonomıkany yryqtandyrý, bıznes orta men agrarlyq sektordy damytý, eńbek ónimdiligin arttyrý, ár jobanyń ekonomıkalyq tıimdiligi turǵysynan bilim berý jáne densaýlyq saqtaý salalaryn jetildirý boıynsha birlesken jobalardy iske asyrý barysyn qarady.
Sondaı-aq, B. Saǵyntaev pen S. Mıýller 2018 jylǵa josparlanǵan ınfraqurylymdyq jobalardy jáne 2020-2022 jyldarǵa arnalǵan yntymaqtastyq josparlaryn talqylady.
Elimizdiń tranzıttik áleýeti máselesine erekshe kóńil bólindi. S. Mıýller Qazaqstannyń geografııalyq ornalasqan jeriniń tıimdi ekenine nazar aýdara otyryp, elimizdiń tranzıttik ótkizý qabiletin arttyrý qyzmet kórsetý salasyna, qazaqstandyq taýarlardy ótkizýge jáne jańa jumys oryndarynyń ashylýyna septigin tıgizetinin atap ótti.
Aıta keteıik, Dúnıejúzilik bank damýshy elderge qarjylyq jáne tehnıkalyq kómekti uıymdastyrý maqsatymen 1944 jyly qurylǵan.
Qazaqstan 1992 jylǵy shildeden bastap Dúnıejúzilik banktiń múshesi. Dúnıejúzilik bank 1992 jyldan bastap QR-ǵa 46 jobany qarjylandyrý úshin qaryzǵa qarajat bergen. Qazirgi tańda 6 joba qoldanysta.
Dúnıejúzilik bank Qazaqstannyń júıelik eldik dıagnostıka jumystaryn júrgizýde. Ol seriktestiktiń qol jetkizilgen nátıjelerine taldaý jasaýǵa jáne odan ári yntymaqtastyqty jalǵastyrýǵa arnalǵan basymdyqty baǵyttardy anyqtaýǵa baǵyttalǵan. Qazaqstannyń kezekti eldik dıagnostıkasynyń prezentatsııasy bıyl 15 maýsymda H Astana ekonomıkalyq forýmy aıasyndaǵy Dúnıejúzilik banktiń sessııasyna josparlanǵan.
