Saǵyntaev pen Batalov eki óńirdiń shekaralas aımaǵyn damytýdy talqylady
ALMATY. QazAqparat – Almatyda qala basshysy Baqytjan Saǵyntaev pen Almaty oblysynyń ákimi Amandyq Batalovtyń qatysýymen eki óńirdiń irgeles aımaǵyn damytý máseleleri boıynsha keńes ótti, dep habarlaıdy QazAqparat tilshisi.
Almaty ákimdiginiń habarlaýynsha, ákimder megapolıs pen oblystyń shekaralas eldimekenderi turǵyndarynyń áleýmettik máselelerin sheshýge baǵyttalǵan is-qımyldy talqylady. Problemanyń negizgi spektri anyqtaldy - turǵyn úı jáne áleýmettik nysandar qurylysy, kólik jáne jol ınfraqurylymyn nyǵaıtý, azyq-túlik qaýipsizdigi jáne týrıstik áleýetti arttyrý. Kásipkerlikti damytý arqyly jumys oryndaryn qurýǵa basa nazar aýdaryldy.
Almaty ákiminiń orynbasary Muhıt Ázirbaevtyń aıtýynsha, turǵyn úı salý úshin qalada bos jer joq. Baspanaǵa degen suranys qurylys qarqynynan basym. Úı kezegindegiler sany jyl saıyn 10%, ıaǵnı 2400 adamǵa artyp otyrady. Máseleni sheshýdiń bir joly - oblys aýmaǵynda 2015 jylǵy tájirıbe boıynsha turǵyn úı salý. Ol kezde Almaty qalasynda baspana kezeginde turǵan 900-den astam adam Qarasaı aýdanyndaǵy «Asyl Arman» turǵyn úı kesheninen páter alǵan bolatyn.
Kólik qatynasyn damytý úshin B.Saǵyntaevtyń tapsyrmasy boıynsha, qalamańy tasymalymen qalalyq mýnıtsıpaldy jáne jeke avtoparkter aınalysatyn bolady. Qyzmet kórsetý sapasyn arttyrý maqsatynda tasymaldaý erejesi kúsheıtiledi. Bilim basqarmasy tasymaldaýshylarmen jáne kolledjdermen birge júrgizýshiler men servıstik qyzmetshiler quramyn oqytý men qaıta oqytýdy qolǵa alady. Mindet – jalpy júrgizýshilik mádenıetti arttyrý.
Aıta keterligi, kólik ótkizý qabiletin arttyrý úshin qalada jolaıyryqtar salynyp, úńgileý jumystary júrýde. «Altyn-Orda» bazary mańyndaǵy joldy tez arada keńeıtý qajet. Sondaı-aq radıaldy joldar qurylysyn jyldamdatqan jón. Jańa jol qubyrlary men ınjenerlik jelilerdi salý kelisip atqarylady.
Almatyny azyq- túlikpen qamtamasyz etý – úılesimdi is-qımyldy qajet etetin mańyzdy máseleniń biri. Almaty – elimizdiń iri tutyný naryǵy. Sońǵy 5 jyl ishinde qala turǵyndarynyń sany 20% ósip, 1,8 mln adamnan asty. Áleýmettik mańyzy bar azyq-túlikterdi - kókónisti, et pen sút ónimderin, jemis-jıdekti, túrli jarmalardy tutynýdyń jyl saıynǵy kólemi – 1,1 mln tonna.
Almaty oblysy qalaǵa aýylsharýashylyq ónimderin basty jetkizýshi bola alady. Alaıda, qazir tutyný kóleminiń jartysynan azy ǵana jetkizilýde.
Aýylsharýashylyq ónimderin tasymaldaý men jetkizý júıesin aradaǵy deldalsyz durys jolǵa qoıý turǵyndarǵa qoljetimdi ónimder satyp alýǵa múmkindik beredi.
Almaty ákimi eńbekpen qamtý jáne jumys oryndaryn ashý máselesine erekshe nazar aýdardy. Ol úshin shet aımaqtar men qalaǵa jaqyn ornalasqan eldi mekenderde turǵyndar qajettiligi men eńbek naryǵyn eskere otyryp, shaǵyn jáne orta bıznesti damytý qajet.
Jańa jumys oryndaryn ashýdyń draıveri týrıstik áleýetti damytý bolyp tabylady. Mamandardyń málimeti boıynsha, Almatyǵa kelgen sheteldik týrısterdiń 80% oblystyń týrobektilerinde bolýdy qalaıdy eken.
Qoljetimdilik pen jaıly jaǵdaıdy qalyptastyrý úshin kólik jáne joljıegi ınfraqurylymdaryn damytý qajet. Almatydan yńǵaıly avtobýstarmen shyǵatyn týrısterdiń Almaty oblysynda ornalasqan ulttyq parkterge saparyn uıymdastyrǵan jón.
«Búgingi áńgimeniń Almaty men Almaty oblysynyń shekaralas aımaqtarynda jańa ıgilikti isterdiń paıda bolýyna yqpal etetinine senimdimin. Bul, bizdiń birigip atqaratyn aýqymdy jumystarymyzdyń bastaýy bolady», - dep atap ótti B. Saǵyntaev.
