Saǵyntaev pen Abdýlla ekijaqty yntymaqtastyq máselelerin talqylady

ASTANA. QazAqparat - Búgin Bishkektegi ShYU múshe memleketterdiń Úkimet basshylary keńesiniń jumysy aıasynda Qazaqstan Respýblıkasy Premer-Mınıstri Baqytjan Saǵyntaev Aýǵanstan Islam Respýblıkasynyń Atqarýshy bıliginiń basshysy Abdýlla Abdýllamen kezdesti.

Bul týraly QazAqparat  QR Úkimetiniń baspasóz qyzmetine silteme jasap habarlady.

Taraptar saýda-ekonomıkalyq, gýmanıtarlyq salalardaǵy jáne óńirlik qaýipsizdiktegi ekijaqty yntymaqtastyq máselelerin talqylady.

Málim bolǵandaı, Qazaqstan Aýǵanstanǵa praktıkalyq qoldaý kórsetýdi jalǵastyryp keledi. Atap aıtqanda, Qazaqstan transshekaralyq temir jol jelilerin keńeıtý, CASA-1000 elektr energııasyn ótkizýdiń joǵarǵy voltti jelileri jáne Ortalyq Azııa elderinen ońtústik baǵyttaǵy qubyr jelisi jobalaryn qosa alǵanda Aýǵanstannyń qatysýymen óńirlik ınfraqurylymdy damytýǵa baǵyttalǵan bastamalardy ilgeriletýge járdemdesýde.

Budan ózge, Qazaqstan Aýǵanstanǵa ekijaqty jáne kópjaqty deńgeıde tehnıkalyq jáne gýmanıtarlyq kómek kórsetýde.

Qazirgi ýaqytta qazaqstandyq oqý oryndarynda beıbit mamandyqtar boıynsha joǵary jáne orta kásiptik-tehnıkalyq bilim alý múmkindigi 994 aýǵan stýdentine berildi.

QR Úkimeti Aýǵanstanda mektepter, aýrýhanalar jáne joldar salýǵa 2,3 mln dollar bóldi. 20 myń tonnaǵa jýyq azyq-túlik kóleminde gýmanıtarlyq jetkizilimder júzege asyryldy (jalpy 17 mln dollardan astam somaǵa).

Qazaqstan BUU Qaýipsizdik Keńesiniń 2017-2018 jyldardaǵy turaqsyz múshesi retinde óńirlik qaýipsizdikti qamtamasyz etý salasyndaǵy múddelerdiń ortaqtyǵyn eskere otyryp, Aýǵanstan Islam Respýblıkasynyń qatysýymen janjaldardy retteý jáne aldyn alý máselelerine belsendi qatysady.