Saǵyntaev Pavlodarda ónerkásiptik kásiporyndardy tehnologııalyq jańǵyrtý máselesin talqylady
ASTANA. QazAqparat - QR Premer-Mınıstri Baqytjan Saǵyntaev Pavlodarda oblystyń ónerkásiptik jáne energetıkalyq kásiporyndarynyń basshylarymen keńes ótkizdi, onda Elbasynyń «Qazaqstannyń úshinshi jańǵyrýy: jahandyq básekege qabilettilik» atty Joldaýyn iske asyrý aıasyndaǵy tehnologııalyq jańǵyrtý máseleleri boıynsha pikir almasyldy, dep habarlaıdy primeminister.kz.
Kezdesý barysynda Pavlodar oblysynyń ákimi B. Baqaýov el Prezıdenti Joldaýynyń óńirde iske asyrylýy týraly, sonymen qatar ónimdi jumyspen qamtý men jappaı kásipkerlikti damytý baǵdarlamasy aıasynda jańa jumys oryndaryn ashý jáne servıstik ekonomıkany damytý sharalary týraly baıandady.
Keńeste kásiporyndardy jańǵyrtý josparlary týraly «Eýrazııa toby» JShS basqarma tóraǵasy A. Qaztaevtyń, «Kaz Minerals PLC» basqarma tóraǵasy O. Novachýktiń, «KSP Steel» JShS bas dırektory E. Kreımerdiń, «Bogatyr Kómir» JShS bas dırektory S. Raıpovtyń baıandamalary tyńdaldy.
Ónerkásiptik kásiporyndardyń ókilderi otyn-energetıkalyq keshen nysandarynyń qurylysyna qatysty máselelerdi qozǵady. Bul týraly QR ınvestıtsııalar jáne damý mınıstri J. Qasymbek pen QR energetıka mınıstri Q. Bozymbaev túsinikteme berip ótti.
Zamanaýı tehnologııalyq jabdyqta jumys jasaıtyn mamandardy daıarlaý máselesine erekshe kóńil bólindi. Atalǵan taqyryp boıynsha QR Bilim jáne ǵylym vıtse-mınıstri B. Asylova sóz sóıledi.
QR Premer-Mınıstri Baqytjan Saǵyntaev óńirdiń ónerkásiptik kásiporyndary basshylarynyń nazaryn álemdik naryqtarda ónimderdiń básekege qabilettiligin arttyrý maqsatymen ónerkásiptik úderisterdi tsıfrlandyrý men robottandyrý mindetterin sheshý máselesine aýdardy.
Atalǵan máseleler Qaraǵandy oblysyndaǵy kóshpeli keńes kezinde tolyǵyraq talqylanatyn bolady. Onda elimizdiń barlyq júıequraýshy kásiporyndaryn tehnologııalyq jańǵyrtý barysy qaralady.
