Saǵyntaev OQO jáne Jambyl ákimderiniń daýyldan keıingi qalpyna keltirý jaıly baıandamasyn tyńdady
ASTANA. QazAqparat - QR Premer-Mınıstri Baqytjan Saǵyntaev Ońtústik Qazaqstan jáne Jambyl oblystarynyń ákimderiniń daýyldan keıingi qalpyna keltirý jumystary jaıly baıandamasyn tyńdady, dep habarlaıdy primeminister.kz.
«Úkimettiń kezekti otyrysyn bastamas buryn qatty daýyldan zardap shekken ońtústik óńirlerdegi, ásirese, Jambyl oblysyndaǵy tótenshe jaǵdaıǵa toqtalǵym kelip otyr. Tabıǵı apattan ınfraqurylym nysandaryna zaqym kelip, birneshe aýdan jaryqsyz qaldy. Qatty jel ǵımarattar men úılerdiń shatyrlaryn julyp áketti. Men oblys ákimderi men tıisti memlekettik organdardyń basshylaryna shuǵyl tapsyrma bergen bolatynmyn. Sondaı-aq, osy máseleni Asqar Uzaqbaıulyna baqylaýǵa alýdy tapsyrǵanmyn. Kárim Násbekuly, qalpyna keltirý boıynsha qandaı jumystar atqaryldy, baıandańyz», - dep surady B. Saǵyntaev.
«Tabıǵı apattan Taraz qalasyndaǵy jáne oblystyń bes aýdanyndaǵy nysandar zardap shekti. Barlyǵy 1 754 nysan zardap shekti, onyń ishinde 454 nysannyń shatyrynyń 70% zaqymdandy. 53 myń abonent elektr jelisinen ajyrap qaldy, bes eldi mekende gaz berý toqtady. Shuǵyl túrde TJ saldaryn joıý sharalaryn qabyldadyq, azamattyq qorǵanys kúshteri men quraldaryn joǵary ázirlikke kóshirdik, qoǵamdyq tártip pen jol qozǵalysyn kúsheıttik. Shuǵyl jumystar nátıjesinde sol kúni, 3 qarashada gaz berý qalpyna keltirildi, 4 qarashada halyqqa jylý berý jalǵastyryldy, 6 qarashada aýyldyq eldi mekenderde elektr jelisin berý qalpyna keltirildi. Búginde Tarazda jekemenshik turǵyn úı sektoryndaǵy 351 abonentke jaryq berý jumystary jalǵasyp jatyr. 36 azamat medıtsınalyq kómekke júgindi, onyń 4-ýi aýrýhanaǵa jatqyzyldy. Taraz qalasynda, Baızaq, Moıynqum jáne Shý aýdandarynda jergilikti mańyzǵa ıe TJ rejimi engizildi», - dep habarlady Jambyl oblysynyń ákimi K. Kókirekbaev.
Óz kezeginde, OQO ákimi J. Túımebaev oblysta qalpyna keltirý jumystary júrgizilip jatqanyn habarlady.
Eske salaıyq, 3 qarasha kúni Jambyl jáne Ońtústik Qazaqstan oblystarynda ekpini sekýndyna 30 metr jyldamdyqqa jetken qatty jel turyp, sonyń saldarynan Jambyl oblysynyń Baızaq, Jambyl, Jýaly, Shý aýdandary zardap shekken bolatyn.
