Saǵyntaev Nokia ókilimen tsıfrlyq ekonomıka máselesin talqylady

ASTANA. QazAqparat - Búgin XI Astana ekonomıkalyq forýmy aıasynda QR Premer-Mınıstri Baqytjan Saǵyntaev Nokia aǵa vıtse-prezıdenti Markýs Borhertpen tsıfrlyq ekonomıka men ındýstrııany damytýǵa baǵyttalǵan zamanaýı jáne joǵary tehnologııalyq sheshimderge qatysty salalardy damytý máseleleri boıynsha kezdesý ótkizdi. Bul týraly primeminister.kz habarlaıdy.

«Tsıfrlyq Qazaqstan» memlekettik baǵdarlamasyn iske asyrýǵa erekshe kóńil bólindi, onyń aıasynda jańa ınnovatsııalyq tehnologııalardy engizý, tsıfrlyq teńsizdikti joıý, sondaı-aq ónerkásip, aýyl sharýashylyǵy men áleýmettik salany jyldamdyǵy joǵary ınternetpen qamtý boıynsha órshil maqsattar qoıyldy. 

Budan basqa, taraptar Astana qalasynda Nokia kompanııasynyń keńsesin ashý máselesin talqylady. Eske salaıyq, 2018 jyly tıisti sheshim qabyldanǵan bolatyn. Búgingi tańda daıyndyq jumystary júrgizilip jatyr, ashylýy 2018 j. shilde aıyna josparlanǵan. 

Nokia Qazaqstanda uzaq ýaqyttan beri jumys istep keledi. 2007 jyly kompanııa Nokia Siemens Networks degen ataýmen ónimder/sheshimder jetkizdi, áıtse de, Siemens kompanııasy Qazaqstanda 1994 jyldan, «Qazaqtelekom» AQ úshin optıkalyq magıstraldi jeli salynǵannan beri bar. 2010 jyly kompanııa Motorola kompanııasynyń telekommýnıkatsııalyq aktıvterin satyp aldy, 2012 jyly - Panasonic symsyz baılanys bólimshesi alyndy, 2016 jyly iri telekommýnıkatsııa alyby - Alcatel Lucent satyp alý boıynsha kelisim tabysty aıaqtaldy.

«Nokia Qazaqstan» kompanııasynda 50-ge jýyq qyzmetker bar. Kompanııa Qazaqstandaǵy óziniń shtaty men jobalaryna ınvestıtsııa salýdy jalǵastyrýda, sebebi, Qazaqstanda tsıfrlandyrý naryǵy úzdiksiz ósip keledi. 

QR Úkimetimen ózara is-qımyl boıynsha Nokia kompanııasy eldegi óziniń jumysyn jaqsartyp, aqparattyq tehnologııalar men kommýnıkatsııalar sektoryndaǵy kásiporyndar úshin ǵana emes, ekonomıkanyń taý-ken, munaı-gaz,kólik, energetıka, memlekettik, agroónerkásiptik sektorlary úshin de tsıfrlyq ınfraqurylymdardyń jetekshi jetkizýshisi bolýdy maqsat etedi. 

Nokia «Tsıfrlyq Qazaqstan» memlekettik baǵdarlamasyn iske asyrý aıasynda Qazaqstanda 5G baılanys jelisin óristetýdi yntalandyrýǵa múddeli. 5G baılanys jelisin óristetý 2019 jyly bastalady dep josparlanǵan. 

Kezdesý barysynda Markýs Borhert QR aýmaǵynda atalmysh jelilerdi ýaqytyly engizý úshin, jáne jalpy tsıfrlyq ekonomıka men ındýstrııany damytýǵa baǵyttalǵan zamanaýı jáne joǵary tehnologııalyq sheshimder aıasynda salany damytý boıynsha óziniń usynystaryn bildirdi. 

Eske salaıyq, búgin elordada XI Astana ekonomıkalyq forýmy óz jumysyn bastady. Bıyl forým Global Challenges Summit retinde jańartyldy, bul - jahandyq kún tártibi men jańa formatty bildiredi. Forým alańynda eń jańa zamanaýı mýltımedııalyq sheshimder paıdalanylady: vızıonerlerdiń sóz sóıleýi, ınnovatsııalyq prezentatsııalar, jarııa ıntervıý, arnaıy vorkshoptar t.s.s. Búgin Memleket basshysynyń qatysýymen plenarlyq otyrys ótti. Forým 17 mamyr men 19 mamyr aralyǵynda "Ekspo"-nyń Kongress ortalyǵynda jáne Hilton Astana meımanhanasynda ótedi. 

 

Anyqtama: Nokia - biriktirilgen álemniń eń ortasynda ınnovatsııalyq tehnologııalardy engizgen álemdik kóshbasshy. Nokia Bell Labs zerthanasynyń zertteýleri men ınnovatsııalary kommýnıkatsııalyq qyzmetterdi jetkizýshilerge, úkimetterge, iri kompanııalar men tutynýshylarǵa ónimder, qyzmetter men lıtsenzııalardyń kóptegen túrlerin usynady. 

5G men zattar ınterneti úshin ınfraqurylym qurýdan bastap vırtýaldy shynaıylyq pen tsıfrlyq medıtsınalyq dıagnostıka salasyndaǵy jańa sheshimderge deıin kompanııa ómirlik tájirıbeni ózgertý úshin tehnologııalardy qurady.