Saǵyntaev munaıǵa qatysty ýaǵdalastyq boıynsha ekonomıkanyń jaqsaratynyn boljap otyr
ASTANA. QazAqparat - QR Úkimet basshysy Baqytjan Saǵyntaevtyń paıymynsha, álemde munaı óndirý kólemin qysqartý týraly ýaǵdalastyqqa baılanysty ekonomıkadaǵy jaǵdaı jaqsara túsedi, dep habarlaıdy QazAqparat.
«Ótken senbide Venada OPEK-ke múshe emes elder munaı óndirý kólemin tómendetý týraly ýaǵdalasqanyn kórdik, onyń ishinde biz de táýligine 20 myń barrelge deıingi kólemdi bekittik. Búginde baǵa 57 dollarǵa deıin jetip otyr. Bul óz kezeginde ahýaldyń jaqsarýy turǵysynda bizdi úmittendirip otyr. Osy oraıda aldaǵy jyl aǵymdaǵy jylǵa qaraǵanda tabysty bolatynyna senim artamyz»,-dep toqtaldy B. Saǵyntaev Úkimet otyrysynda.
Budan buryn habarlanǵandaı, 10 jeltoqsanda Venadaǵy kezdesýden keıin munaı baǵasy ósýi múmkin ekenin QR Energetıka mınıstri Qanat Bozymbaev aıtqan bolatyn.
«Qazaqstan alty aıǵa munaıdy óndirýdiń kólemin qysqartý jónindegi munaı óndiretin elderdiń umtylystaryn qoldaıdy. OPEK elderiniń bastapqy jarty jylǵa óndirýdi 3-4 paıyzǵa jýyq shekteý týraly qabyldaǵan sheshimi munaıǵa baǵanyń 17 paıyzǵa ósimin berdi. Eger qazir 10 jeltoqsan kúni OPEK-ke múshe emes elder tıisti sheshim qabyldaıtyn bolsa, onda munaı baǵasy ary qaraı ósetinin boljap otyrmyz. Bul óz kezeginde Qazaqstannyń, sondaı-aq munaı óndiretin kompanııalardyń tabysyna qolaıly áser etedi»,-dedi Bozymbaev. Mınıstrdiń paıymynsha, munaı óndirýdi shekteý Qazaqstan úshin problemalar týdyrmaıdy.
Esterińizge sala keteıik, 2016 jyldyń 10 jeltoqsanynda Venada OPEK-ke múshe emes elderdiń kezdesýi ótti. OPEK munaı naryǵyndaǵy jaǵdaıdy turaqtandyrý úshin Venaǵa uıymǵa múshe emes 14 memlekettiń ókilderin shaqyrdy. Sonymen qatar aǵymdaǵy aıdyń basynda QR Energetıka mınıstrligi Qazaqstan álemdik munaı qaýymdastyǵynyń munaıdy óndirýdiń kólemin qysqartý jónindegi umtylystaryn qoldaıtynyn málimdegen bolatyn.
