Saǵyntaev Mınıstrler kabınetine birqatar tapsyrmalar júktedi

Úkimet otyrysy barysynda, bıznesti qoldaý quraldaryn odan ári jetildirý jáne memlekettik-jekemenshik seriktestik qoldaný tetikterin engizý boıynsha tapsyrmalar berildi.

"Ulttyq ekonomıka mınıstrligine, Densaýlyq saqtaý jáne áleýmettik damý mınıstrligine, múddeli memlekettik organdarmen birge jumyspen qamtýdy yntalandyrý tetikterin damytý boıynsha usynysty Úkimetke engizýdi tapsyramyn. Onyń ishinde, shaǵyn nesıelendirý baǵdarlamasyna, onyń ishinde aýyl adamdaryn nesıelendirýge mańyz berý qajet. Densaýlyq saqtaý jáne áleýmettik damý mınıstrligine ákimdermen birge azamattardyń eńbek mobıldiligin qamtamasyz etý boıynsha qosymsha sharalardy qabyldaýdy júkteımin. Bilim jáne ǵylym mınıstrligine túlekterdi tegin kásiptik bilim berý baǵdarlamasyn merzimine sáıkes júzege asyrýdy qolǵa alsyn. Ulttyq ekonomıka mınıstrligi ákimdermen birge MJS tetikterin belsendi qoldaný sharalaryn qabyldasyn", - dedi Premer.

Sonymen qatar ol barlyq memlekettik organdar jáne olardyń vedomstvolyq uıymdary qaıta ınventerızatsııadan ótkizilýin buıyrdy.

"Keńeıtilgen otyrysta Memleket basshysy 11 mınıstrlikte 371 vedomstvolyq uıym baryn aıtty. Munshama uıymnyń qajeti bar ma?! Olardyń ákimshilik shyǵyndaryna ǵana byltyr 119 mlrd. teńge jumsaldy. Bul óte kóp qarajat. Bul tek ortalyq memlekettik organdar boıynsha. Ákimdikterde taǵy 6500 uıym bar. Alaıda jekeshelendirýdiń keshendi baǵdarlamasy aıasynda satylymǵa tek 416 nysan qoıyldy. Bul tek jalpy kólemniń 6%-y ǵana. Sondyqtan Qarjy mınıstrligine jáne Ulttyq ekonomıka mınıstrligine ınventerızatsııa máselesine óte qatań qaraýdy tapsyramyn. Qandaı uıym qajet, qandaı uıym jekemenshik úleske kete alatynyn anyqtaý qajet. Osyndaı jumysty ákimdikter ózderinde júrgizýleri shart", - dep atap ótti B. Saǵyntaev.