Saǵyntaev Memleket basshysynyń tapsyrmalary jóninde keńes ótkizdi
ASTANA. QazAqparat - Búgin Úkimet úıinde QR Premer-Mınıstri B. Saǵyntaev Memleket basshysy N. Nazarbaevtyń halyqqa Joldaýlarynda, «Ult josparynda», «Bes áleýmettik bastamasynda», sondaı-aq, Úkimettiń keńeıtilgen otyrystarynda, Qaýipsizdik keńesiniń otyrysynda, Parlament sessııasynyń ashylýynda jáne óńirlerge saparlar kezinde bergen tapsyrmalaryn oryndaý máseleleri jóninde keńes ótkizdi, dep habarlaıdy primeminister.kz.
Keńes barysynda ortalyq jáne jergilikti memlekettik organdardyń, kvazımemlekettik sektordyń Prezıdent tapsyrmalaryn oryndaý aıasyndaǵy jumystary jan-jaqty talqylanyp, taldandy. Premer-Mınıstrdiń orynbasarlarynyń, mınıstrler men oblys ákimderiniń baıandamalary tyńdaldy.
Premer-Mınıstrdiń orynbasary E. Dosaev ekonomıkalyq jáne áleýmettik salalar jóninde sóz sóıleı otyryp, QR Prezıdentiniń ekonomıkalyq ósimdi kem degende 4% deńgeıinde qamtamasyz etý, ónerkásip, qurylys salalaryn, eksportty damytý, iri ınvestıtsııalyq jobalardy iske asyrý týraly bergen tapsyrmalaryn iske asyrý barysy jaıynda baıandady. Bilim berý, medıtsınalyq qyzmetterdi usyný, ónimdi jumyspen qamtý sapasyn odan ári arttyrý, ekonomıkaǵa memlekettiń qatysý úlesin qysqartý jáne jekeshelendirý, kásipkerlikti damytýǵa tosqaýyl bolatyn ákimshilik kedergilerdi azaıtý maqsatynda qabyldanyp jatqan sharalar qaraldy.
Premer-Mınıstrdiń orynbasary Ó. Shókeevtiń baıandamasynda agroónerkásip kesheni, jer máseleleri, aýyldy jerlerde halyqty ónimdi jumyspen qamtý, sýmen qamtamasyz etý jáne sýmen jabdyqtaý máseleleri atalyp ótti. Atap aıtqanda, 2018 jylǵy jer qoryna taldaý júrgizý, iri qara mal etin óndirý, óńdeý jáne eksporttaý, aýyl sharýashylyǵy kooperatsııalaryn damytý jaǵdaıy talqylandy.
Premer-Mınıstrdiń orynbasary A. Jumaǵalıev óz baıandamasynda ekonomıka salalaryn tsıfrlandyrý men memlekettik qyzmetterdi avtomattandyrý jónindegi ózekti máselelerdi sheshý joldary men qazirgi jaǵdaımen tanystyrdy.
Keńes qorytyndysyn shyǵara otyryp, QR Premer-Mınıstri Baqytjan Saǵyntaev mınıstrler men ákimderge óńdeý sektoryndaǵy eńbek ónimdiliginiń ósimin arttyrýdy, ındýstrııalandyrý, ınvestıtsııalyq jobalardy iske asyrý, noý-haý transferine arnalǵan biliktilik ortalyqtaryn qurýǵa baǵdarlanǵan «Ulttyq chempıondar» bastamasy aıasynda memlekettik qoldaýdyń barlyq sharalaryna egjeı-tegjeıli taldaý júrgizýdi tapsyrdy.
Memlekettik organdardyń vedomstvoǵa qarasty uıymdarynyń sanyn qysqartý, shaǵyn nesıe berýge jáne arendalyq, nesıelik turǵyn úılerdi salýǵa bólingen qarajattardy ýaqytyly ıgerý esebinen jekeshelendirý protsesin jandandyrý boıynsha birqatar tapsyrmalar berildi.
Mektepterde, JOO-lar men kolledjderde mamandardy daıarlaý sapasyn arttyrý, stýdentterge jataqhanalar salý, apatty jáne úsh aýysymdy mektepterdiń sanyn qysqartý jónindegi naqty júıelik sharalardy qabyldaý máselelerine basa den qoıyldy.
