Saǵyntaev mektep qurylysyn jandandyrýdy tapsyrdy
«Memleket basshysy bilimge, muǵalimderge qoldaý kórsetýge, olardyń eńbek jaǵdaılaryn jaqsartýǵa erekshe nazar aýdardy. Máselen, jyl basynan beri muǵalimderdiń jalaqysy 25 paıyzǵa ósti. Almatyda jas muǵalimniń ortasha jalaqysy 157 myń teńge. Bul soma 2022 jylǵa qaraı 183 myń teńgege jetedi»,- deıdi ákim.
Pedagogtardyń motıvatsııasy men biliktilik deńgeıin arttyrý, bilim berý qyzmetkerleriniń kadrlyq áleýetin damytý úshin «Almaty mektepteri» qalalyq baǵdarlamasy júzege asyrylatyn bolady.
Bul rette Memleket basshysynyń tapsyrmasyna sáıkes qashyqtan bilim berý formattary úshin aqparattyq júıelerdiń sapasyn arttyrý máselesi pysyqtalatyn bolady.
Budan basqa, 2025 jylǵa qaraı barlyq bilim berý uıymdarynda qoljetimdilikti qamtamasyz etý jáne ınklıýzıvti bilim berý jumysy jalǵasatyn bolady.
B. Saǵyntaev bilim basqarmasyna halyqaralyq pándik olımpıadalardyń jeńimpazdary men júldegerlerin joǵary oqý oryndaryna konkýrstyq negizde túsýge granttarmen qamtamasyz etý máselesin pysyqtaýdy tapsyrdy.
Daryndy balalardy jan-jaqty qoldaý, olarǵa bir rettik aqshalaı syıaqy tóleý, sondaı-aq daryndy oqýshylardy tárbıelegen muǵalimderdi kótermeleý múmkindigi de qarastyrylatyn bolady.
Áleýmettik qorǵalmaǵan otbasynan shyqqan 23 myń balaǵa jappaı bilim berý qorynyń kómegi kórsetildi. Jańa oqý jylynyń bastalýymen «Mektepke jol» aktsııasy arqyly 800 mıllıon teńgeden astam kómek kórsetildi. Sonymen qatar, osy sanattaǵy balalar mektepte tegin tamaqtanatyn bolady.
Negizgi máselelerdiń biri – oqýshy oryndarynyń tapshylyǵyn azaıtý. Bıyl 3,5 myń oqýshyǵa arnalǵan 11 jekemenshik mektep ashyldy, 4 150 oryndyq 9 jańa ǵımarat paıdalanýǵa berildi. Taǵy 8 mektep qazan aıynyń sońyna deıin paıdalanýǵa beriledi.
Memleket basshysynyń 2025 jyldyń sońyna deıin myń mektep qurylysy boıynsha qoıǵan tapsyrmasyn oryndaý maqsatynda Almaty ákimi Baqytjan Saǵyntaev oqýshy oryndaryn ulǵaıtý boıynsha sharalar men jańa tásilder keshenin ázirleýdi tapsyrdy.