Saǵyntaev: Medıtsınalyq saqtandyrý jumysyn atqara almasaq, xalyqtyń ashýyna iligemiz
ASTANA. QazAqparat - Qazaqstan Premer-Mınıstri Baqytjan Saǵyntaev áleýmettik medıtsınalyq saqtandyrý júıesin engizý boıynsha júrgizilip jatqan jumystar týraly xalyq arasynda túsindirý júrgizýdi tapsyrdy, dep xabarlaıdy QazAqparat.
"Biz mindetti áleýmettik medıtsınalyq saqtandyrýdy engizý kezeńindemiz. Bul árbir qazaqstandyqqa qatysty bolǵandyqtan, Densaýlyq saqtaý mınıstrligi men jumys berýshiler taraptarynan naqty tıimdi jumystar jasalýy kerek. Úkimettiń keńeıtilgen otyrysynda Memleket basshysy mindetti áleýmettik medıtsınalyq saqtandyrý boıynsha jumystardy xalyqqa keńinen túsindirýdi tapsyrǵan bolatyn", - dedi Saǵyntaev Úkimet otyrysynda.
Premer-Mınıstrdiń sózinshe, belgili bir jumystar atqarylyp jatqanmen, onyń belsendiligi tómen. Ótkizilip otyrǵan jıyndar xalyqty az qamtýda.
Úkimet basshysynyń atap ótkenindeı, áleýmettik jelilerde, ınternette túsindirý az, sarapshylardy tartý jaǵy da kemshin tartyp otyr.
"Byltyr ózim ádeıilep ıÝtýbta beınerolık qaradym. Beınerolık jaman emes. Biraq adamdar mindetti medıtsınalyq saqtandyrý bolatynyn bilmeıtin sııaqty, sebebi rolıkti az adam qaraǵan. 10 aıda nebári 4 myń kórilim. Ony negizinen rolıkti jasaǵan adamdar, kimge qyzyq, solar qarap shyqqanǵa uqsaıdy. Biraq kópshilik sol jumystyń maǵynasyn bilmeıdi de. Sondyqtan qyrýar jumys atqarý kerek. Reformaǵa jumyssyzdar, ózin-ózi qamtyp otyrǵandar engendikten, olar úshin bul mańyzdy. Eger biz bul jumysty qulatyp alsaq, xalyqtyń ashýyna iligemiz. Sondyqtan Densaýlyq mınıstrligi ákimdermen birge túsindirý jumystaryna nazar aýdarýy qajet", - dedi Saǵyntaev.
