Saǵyntaev medıtsına salasynda Google kompanııasymen baılanysty nyǵaıtýdy júktedi
ASTANA. QazAqparat - Búgin Úkimet otyrysynda QR Premer-Mınıstri Baqytjan Saǵyntaev medıtsınaǵa sońǵy býyndy tehnologııalardy engizý boıynsha QR Densaýlyq saqtaý mınıstrligine Google kompanııasymen ózara is-qımyldy kúsheıtý tapsyrmasyn júktedi, dep habarlaıdy QazAqparat.
Atap aıtqanda, Mınıstrler kabınetiniń otyrysynda Qazaqstan Profılaktıkalyq medıtsına akademııasynyń prezıdenti Almas Sharman densaýlyq saqtaý salasy men salaýatty ómir saltyn ustaný baǵytynda jańa jobalar boıynsha baıandady.
«Memleket tehnologııalyq jobalarǵa (medıtsınalyq) ınvestıtsııa sala otyryp, salada eleýli ról atqara alar edi. Bir aı buryn Almatynyń birneshe kross-fıt jáne fıtnes-klýbtary bizge jolyǵyp, paıdaly tamaqtaný úshin jekeleı qadamdar men oǵan mobıldi qosymshany ázirleý jaıynda ótinish bildirdi. Osy oraıda tıisti ázirlemelerdi jasap, QR Bilim jáne ǵylym mınıstrligine grantqa ótinim berdik. Jalpy, osyndaı jobalar eleýli ról oınaıdy. Eger de «IBM Watson» jekelegen aýrýlardy anyqtaýmen aınalyssa, al eki jyl buryn «Google Flu Trends» sońǵy býyndy tehnologııany ázirlep, ol 10 kún buryn tymaýdyń keńinen taralýyn aldyn ala boljaı alady. Bul tehnologııany Google tarapy Kolýmbııalyq ýnıversıtetke tapsyrdy jáne ol búginde qoljetimdi bolyp otyr», - dedi A. Sharman.
Osy oraıda Úkimet basshysy Baqytjan Saǵyntaev Google jobasy Qazaqstanda qashan engiziletinin suraı kele, osy tektes jobalar elimizde jyldam engizilýi kerektigin tapsyrdy.
Óz kezeginde QR Densaýlyq saqtaý mınıstri Eljan Birtanov qazirgi kezde vedomstvo sońǵy býyndy túrli tetikterdi engizýdi qarastyryp jatqandyǵyn jetkizdi.
«Onyń ishinde Google kompanııasymen baılanys ornatýdamyz, sebebi bul baǵytta jaqsy jańashyldyqtar bar. IBM-men jumysty bastadyq, sonymen qatar Google-men de tıisti josparlardy eskerip otyrmyz», - dedi mınıstr.
Budan buryn habarlanǵandaı, búgin Úkimet otyrysynda Qazaqstanda Qoǵamdyq densaýlyq saqtaý qyzmeti paıda bolatyndyǵy aıtyldy .
«Qazaqstan Respýblıkasynyń densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasynyń negizgi baǵyttarynyń biri qoǵamdyq densaýlyq saqtaý qyzmetin qalyptastyrý bolyp tabylady. Dúnıejúzilik densaýlyq saqtaý uıymynyń anyqtamasy boıynsha qoǵamdyq densaýlyq saqtaý - bul qoǵam qabyldaıtyn, uıymdastyrylǵan is-qımyl arqyly aýrýlardyń aldyn alý, ómir súrýdi uzartý jáne densaýlyqty nyǵaıtý jónindegi ǵylym men tájirıbe. Qazaqstannyń qoǵamdyq densaýlyq saqtaý modeli Dúnıejúzilik densaýlyq saqtaý uıymy aıqyndaǵan qoǵamdyq densaýlyq saqtaýdyń negizgi on shuǵyl fýnktsııasynyń sheńberinde qurylatyn bolady. Bul on fýnktsııa Dúnıejúzilik densaýlyq saqtaý uıymyna barlyq múshe memleket usynatyn halyqqa arnalǵan búkil qyzmettiń paketin qamtıdy», - dedi densaýlyq saqtaý mınıstri Eljan Birtanov.
Bul turǵyda QR Premer-Mınıstri Baqytjan Saǵyntaev bul baǵyttaǵy qadamdar elimizge qajet ekenin atap ótti.
«Sondyqtan múddeli memlekettik organdarmen, ákimdiktermen ózara is-qımyl algorıtmin ázirleý kerek. Jyl sońyna deıin usynylǵan júıeni qurý boıynsha uıymdastyrýshylyq jumystardy aıaqtaý qajet. 2017 jyldyń sońynda atalǵan máseleni qaıta qarastyratyn bolamyz», - dedi Úkimet basshysy.
