Saǵyntaev Maııa Goıkovıchpen Qazaqstan-Serbııa yntymaqtastyǵyn talqylady
ASTANA. QazAqparat - Búgin Úkimet úıinde Premer-Mınıstr Baqytjan Saǵyntaev Serbııa Halyq Skýpşınasynyń tóraıymy Maııa Goıkovıchpen kezdesý ótkizdi, dep habarlaıdy QazAqparat primeminister.kz saıtyna silteme jasap.
Kezdesý barysynda eki memlekettiń áleýmettik-ekonomıkalyq damýynyń túrli salalaryndaǵy ekijaqty yntymaqtastyq máseleleri jáne aýyl sharýashylyǵy, ónerkásip, elektr energetıkasy, qurylys, týrızm, kólik jáne farmatsevtıka salalarynda, tehnologııalyq jańǵyrtýda, qalalaný, sý resýrstary jáne ózge de baǵyttarda naqty ınvestıtsııalyq jobalardy iske asyrý máseleleri talqylandy.
Eki el arasyndaǵy taýar aınalymy 2017 jyldyń qańtar-tamyz aralyǵynda $33,3 mln qurady, bul 2016 jyldyń osy kezeńindegi kórsetkishten 2,4 esege kóp. Ózara saýda kólemi 2016 jyly $26,3 mln qurady. Eksport qurylymy negizinen aýyl sharýashylyǵy ónimderinen turady.
Qazaqstanda 24 serb kásiporny tirkelgen, olar negizinen kóterme jáne bólshek saýda, turǵyn úı jáne turǵyn emes ǵımarattar qurylysy salasynda qyzmet kórsetedi. Serbııa Premer-Mınıstriniń QR-ǵa 2016 jyldyń 16 qarashasyndaǵy jumys sapary barysynda Qazaqstan men Serbııa arasyndaǵy yntymaqtastyqty damytýdyń 2017-2018 jyldarǵa arnalǵan Jol kartasyna qol qoıylǵan bolatyn.
