Saǵyntaev máslıhattyń rólin arttyrýdy usyndy

ALMATY. QazAqparat – Almaty qalasynyń ákimi Baqytjan Saǵyntaev Konstıtýtsııa kúnine arnalǵan saltanatty jıynda qalalyq máslıhattyń rólin arttyrý qajettigi týraly málimdedi, dep habarlaıdy QazAqparat ákimniń baspasóz qyzmetine silteme jasap.

Qala ákiminiń pikirinshe, ásirese, bıýdjetti qabyldaý jáne qarajattyń jumsalýyn baqylaý protsesinde máslıhattyń róli artý kerek.

Osy maqsatta shahar basshysy «Nur Otan» partııasynyń fılıaly janynan áleýmettik-ekonomıkalyq máselelerdi qaraý jónindegi azamattyq komıtet qurýdy usyndy.
Qala turǵyndary osy komıtetke kelip, suraqtaryn qoıa alady. Óz kezeginde komıtet memlekettik organdarmen birlesip, máseleniń sheshý joldaryn qarastyryp, olardyń oryndalýyn baqylaıdy.

Baqytjan Saǵyntaevtyń aıtýynsha, qala ákimdigi Qazaqstannyń Azamattyq alıansymen jáne jergilikti belsendi ÚEU-men birlesip, megapolıstiń azamattyq qoǵamymen ózara is-qımyl tujyrymdamasyn ázirleýde.
Sondaı-aq, barlyq múddeli taraptarmen talqylasý úshin Urban-forým alańy qurylady. Qala halqy, ÚEU ókilderi, developerler, ınvestorlar, startap-jobalardyń bastamashylary, medıa jáne saraptamalyq qaýymdastyq ókilderi qalany odan ári damytý jáne almatylyqtardyń ómir súrý sapasyn arttyrý máselelerin talqylaıdy.