Saǵyntaev Máskeý memýnıversıtetiniń rektorymen eki eldiń ǵylym salasyndaǵy yntymaqtastyǵyn talqylady
ASTANA. QazAqparat - Búgin Úkimet Úıinde QR Premer-Mınıstri Baqytjan Saǵyntaev M. V. Lomonosov atyndaǵy Máskeý memlekettik ýnıversıtetiniń rektory Vıktor Sadovnıchıımen kezdesý ótkizdi, dep habarlaıdy primeminister.kz.
Kezdesý barysynda Memleket basshysy Nursultan Nazarbaevtyń bastamasymen qurylǵan MMÝ irgeli jáne ǵylymı-qoldanbaly zertteýler ortalyǵy men «Astana» halyqaralyq ǵylymı keshenin damytý perspektıvalary talqylandy.
Eske sala ketsek, «Astana» halyqaralyq ǵylymı kesheni (HǴK) 2015 jyly Memleket basshysynyń basty qurylymy - «Astana» taldaý ortalyǵy bazasynda qurylǵan.
Búgingi tańda HǴK-da úsh ınstıtýt pen eki ortalyq jumys jasaıdy: Astana ekonomıka mektebi, Halyqaralyq qatynastar jáne qaýipsizdik ınstıtýty, Saıası jáne tarıhı zertteýler ınstıtýty, Turaqty damý ortalyǵy, Áleýmettik zertteýler ortalyǵy.
Joba qatysýshylary M. V. Lomonosov atyndaǵy Máskeý memlekettik ýnıversıteti (Reseı), Fýdan ýnıversıteti (Qytaı), Kolýmbııa ýnıversıteti (AQSh) jáne Kembrıdj ýnıversıteti (Ulybrıtanııa).
Astana qalasyndaǵy Máskeý memlekettik ýnıversıtetiniń fılıaly 2000 jyly Qazaqstan Respýblıkasynyń Prezıdenti N. Nazarbaevtyń bastamasymen Reseı Federatsııasynyń Prezıdenti V. Pýtınniń belsendi járdemimen qurylǵan.
