Saǵyntaev Másimovke: Uıaly telefonymyzdy shynjyrǵa baılap alýymyz kerek pe
ASTANA. QazAqparat - Búgin Úkimettiń selektorlyq rejimdegi otyrysynda QR Premer-Mınıstri Baqytjan Saǵyntaev Almatyda uıaly telefon urlyǵy órship turǵanyn atap ótti. Sondaı-aq Almaty qalalyq Іshki ister departamentine bul máseleni túbegeıli sheshýdi tapsyrdy, dep habarlaıdy QazAqparat tilshisi.
Otyrys barysynda Almaty qalalyq Іshki ister departamenti bastyǵynyń mindetin atqarýshy Nurlan Másimov ońtústik astanada qazirgi ýaqytta qylmys azaıyp, olardyń ashylýy arta túskendigin aıtty.
«Jasalatyn qylmystardyń 70 paıyzyn urlyq quraıdy. Olar kóbine kúndizgi ýaqytta jasalady. Sondyqtan patrýldik polıtsııa jaıaý jasaqqa kóshirildi. Asa aýyr qylmystar - 18, aýyr qylmystar - 15, adam óltirý 33 paıyzǵa tómendedi», - dedi ol.
«Respýblıkada jasalatyn qylmystardyń 20 paıyzy Almaty qalasynyń úlesine tıesili. Halqynyń sany da kóp. Degenmen, óte úlken kórsetkish, qýantarlyq jaǵdaı emes. Tómen túsirý kerek. Uıaly telefondardy urlaý óte kóp. Soǵan ne jaýap beresiz?», - dedi Premer-Mınıstr óz kezeginde.
Departament basshysynyń aıtýynsha, uıaly telefon urlyǵyna qatysty árbir qylmys tirkeledi. Degenmen, uıaly telefon urlyǵynyń 70 paıyzyn ıeleriniń ony qaldyryp ketýinen oryn alýda.
«Bir-eki kúnnen keıin kelip aryz jazady, naqty ornyn kórsete almaıdy», - dedi Nurlan Másimov.
Onyń mundaı jaýaby Premer-Mınıstrdiń kóńilinen shyqqan joq.
«Urlyqtardyń árbir besinshisi uıaly telefondardyń jymqyrylýyna baılanysty bolyp otyr. Sonda búkil halyq kináli ǵoı, telefondaryn tastap ketedi. Eshkim urlap jatqan joq, ózderi tastap ketetin bolǵany ǵoı. Onda sizdiń oıyńyzsha, shynjyrǵa baılap, qaltamyzǵa salyp júrýimiz kerek bolǵany ǵoı. Ótkende avtokólik bólshekteri boıynsha kóp aıtyldy. Olardy satatyn oryndar bar. Tamyz aıynda biraz reıd jasadyńyzdar. Týra sondaı urlanǵan uıaly telefondardy satatyn oryndar kóp. Satatyn oryn bolǵannan keıin urlaıdy. Osy baǵytta ne jasap jatyrsyzdar?», - dep surady Baqytjan Saǵyntaev.
«Baqytjan Ábdiruly, óte durys aıttyńyz, suranys usynysty týyndatady. Qazir atalǵan saýda núktelerin qarastyryp jatyrmyz. Atalǵan núkteler saýda úılerinde ornalasqan. Biz olarǵa reıd júrgizip, urlanǵan telefondardy tárkileımiz. Sodan keıin ol dúńgirshekterdi jaýyp, qojaıyndarymen áńgimelesý ótkizemiz. Qazir nátıjesi baıqala bastady», - dedi departament basshysy.
