Saǵyntaev Mańǵystaý ákimine azyq-túliktiń qymbattaýyna jol bermeýdi tapsyrdy
ASTANA. QazAqparat - Búgin Úkimettiń selektorlyq rejimdegi otyrysynda Premer-Mınıstr Baqytjan Saǵyntaev Mańǵystaý oblysynyń ákimine azyq-túlik pen qatar ózge de qyzmetterdiń qymbattaýyna jol bermeýdi tapsyrdy, dep habarlaıdy QazAqparat tilshisi.
«Mańǵystaý oblysy ınflıatsııa boıynsha eń joǵary kórsetkish 4,1 paıyz. Eraly Luqpanuly (oblys ákimi Toǵjanov) sizdiń áleýmettik-kásipkerlik korporatsııańyzdyń esep-shotynda birde-bir teńge joq. Al esesine ınflıatsııa 4,1 paıyzdy kórsetip tur», - degen Úkimet basshysy óńir ákimine sóz berdi.
Eraly Toǵjanovtyń aıtýynsha, áleýmettik mańyzy bar azyq-túlik túrlerin satyp alýǵa bólgen qarajat depozıtterde emes, aınalymǵa salynǵan.
«Qordyń kóleminde 862 mln teńgege taýarlardyń 15 túri saqtalǵan. Sondyqtan ınflıatsııanyń áleýmettik mańyzy bar taýarlardyń baǵasyn kóterýine jol berilmeıdi», - dep sendirdi oblys basshysy.
Osy oraıda Baqytjan Saǵyntaev oblys basshysyna jumys tek qana áleýmettik mańyzy bar taýarlar baǵasyn ustap turýda emestigin eskertti.
«Aqyly qyzmetterdiń de baǵasyna baılanysty. Mysaly bilim berý, medıtsınalyq qyzmet kórsetý, basqa da qyzmetter qymbattap ketetin bolsa, onda sizdiń azyq-túlik baǵasyn ustap otyrǵanyńyzdan esh paıda bolmaıdy. Inflıatsııa - 4,1 paıyz. Bir jaǵynan jumysyńyz jaqsy, ekinshi jaǵynan osaldyq tanytyp otyrsyzdar», - dedi Premer-Mınıstr.
Al Mańǵystaý oblysynyń ákimi Úkimet basshysynyń syny oryndy ekendigin jáne ony jyldyń sońyna deıin joıatyndyǵyn aıtyp sendirdi.
