Saǵyntaev: Maqsat - jemqorlyqtan ada qoǵam qurýǵa jaǵdaı jasaý
Keńeske memlekettik, quqyq qorǵaý jáne áskerı organdardyń basshylary, sýdıalar korpýsynyń ókilderi, máslıhat depýtattary, joǵary oqý oryndarynyń rektorlary, medıtsına mekemeleriniń basshylary, mektep pen kolledj dırektorlary qatysty.
Keńesti ashqan Baqytjan Saǵyntaev Memleket basshysynyń sybaılas jemqorlyqqa qarsy kúres memlekettik saıasattyń basym baǵyty bolyp belgilengenin atap ótti.
Alǵash ret zań deńgeıinde basshylardyń sybaılas jemqorlyqta quqyq buzýshylyqtary úshin derbes jaýapkershilik bekitildi.Sondaı-aq basshynyń ujymda sybaılas jemqorlyqtyń aldyn alý boıynsha óz mindetterin júıeli túrde oryndamaǵany úshin jáne sybaılas jemqorlyqtyń aldyn alý boıynsha sharalar qoldanbaǵany úshin jaýapkershilik engizilgen.
«Bizdiń maqsatymyz – qoǵam, bıznes jáne tutastaı alǵanda adamdardyń ómiri sybaılas jemqorlyqtan ada bolýǵa jaǵdaı jasaý», – dedi qala ákimi Baqytjan Saǵyntaev. Buǵan qosa sybaılas jemqorlyqqa qarsy is-qımyldyń tıimdiligi ýaqtyly ári úılestirilgen bolý kerektigin aıtty.
Almaty qalasy jemqorlyqqa qarsy qyzmetiniń basshysy Qaırat Súntaev qaladaǵy sybaılas jemqorlyqtyń ahýaly týraly baıandap berdi.
«Biz burynǵydaı ádildik pen zańdylyqty alǵa qoıyp, árbir sybaılas jemqorlyq faktisine prıntsıpti jáne ymyrasyz qaraıtyn bolamyz», – dep atap ótti qalalyq sybaılas jemqorlyqqa qarsy vedomstvonyń basshysy.
Jıyn barysynda qala ákimi memlekettik organdardyń basshylaryna sybaılas jemqorlyqqa qarsy is-qımyl salasyndaǵy jumysty kúsheıtýdi, «Almaty – adaldyq alańy» jobasyn jandandyrý jáne halyqqa quqyqtyq kómek kórsetetin «Meıirimdilik akseleratory» qoǵamdyq qozǵalysyn qoldaý boıynsha birqatar tapsyrmalar berdi.