Saǵyntaev qylmyspen kúreste aqparattyq tehnologııalardy qoldaný kerektigin aıtty
ALMATY. QazAqparat - Almaty ákimi Baqytjan Saǵyntaev zań buzýshylyqtardyń aldyn alý jáne anyqtaý úshin aqparattyq tehnologııalardy qoldaný kerektigin aıtty, dep habarlaıdy QazAqparat tilshisi.
Qala ákimi Instagram -daǵy paraqshasynda tsıfrlandyrýdyń qylmyspen kúreste eń tıimdi qural ekenin jazdy.
«Tıimdi qoǵamdyq qaýipsizdik, eń bastysy quqyq buzýshylyqtyń aldyn alý úshin adamdar kóp jınalatyn oryndarǵa beınebaqylaý jobalaryn engizýdemiz. 2019-2020 jyldary 1 myń beınekamera ornatyldy, 103 osyndaı kamera tsıfrlyq formatqa aýystyryldy, PD-niń jedel basqarý ortalyǵy jańardy jáne baqylaý ortalyǵy quryldy»,– dep jazdy B. Saǵyntaev.
B. Saǵyntaevtyń aıtýynsha, jalpy Almatyda bıýdjettik baǵdarlamalar boıynsha, jeke uıymdar men memlekettik-jeke áriptestik aıasynda ornatylǵan 120 myń beınebaqylaý kamerasy paıdalanylýda. Syrtqy beınebaqylaý júıesiniń kómegimen 6 myńǵa jýyq qylmys ashyldy. «Sergek» beınekameralary 1,4 mln buzýshylyqty tirkedi.
«Barlyq avtobýstarda ornatylǵan beınekameralardyń arqasynda qalta urlyǵy 2 ese azaıdy. Sonymen qatar, qoǵamdyq kólikte urlyq jasaǵan 85 qylmystyq top áshkerelendi», – dep atap ótti Almaty ákimi.
Sonymen qatar, ol barlyq baqylaý júıeleriniń derekqoryn ıntegratsııalaý jáne jasandy ıntelekt qoldaný Almatyda qylmystyń tómendeýine qol jetkizýge múmkindik beretinin aıtty.
