Saǵyntaev: Kvazımemlekettik sektorda «dınozavrlar» qyzmet etip júr
Onyń paıymynsha, bul adamdar kompanııanyń ınnovatsııalyq jańǵyrýyna kedergi jasap keledi, dep habarlaıdy QazAqparat.
«Búginde jumys istep jatqan kvazımemlekettik kásiporyndarda tıisti kásiporyndy jańǵyrtý baǵatynda eshqandaı qyzyǵýshylyq pen ynta baıqalmaı tur. Sebebi olar turaqty túrde bıýdjet tarapynan qoldaýǵa ıe bolyp keledi. Eger de qandaı da bir másele týyndap jatsa, olar Úkimetke kelip: «Biz kvazımemlekettik kásiporyn bolǵandyqtan, qaramaǵymyzda kóp adam jumys isteıdi. Eger de adamdar sanyn qysqartsaq, onda áleýmettik shıelenis týyndaıdy», dep aıtady. Osyndaı tásilmen olar bizdi úreılendirýge tyrysady», - dep toqtaldy Úkimet basshysy.
Onyń sózine qaraǵanda, bul rette Úkimetten kvazımemlekettik kásiporyndar bıýdjetten qarjy bólýdi surap, olardyń qyzmetine aralaspaýdy alǵa tartady eken. Nátıjesinde, atalǵan kásiporyndar tarapynan damý belgileri baıqalmaıdy.
«Búgin birneshe ǵalymmen jáne ekonomıstpen kezdestim. Olardyń biri jaqsy oı-pikirdi aıtty. Innovatsııalardy engizý - ol ońaı emes, bul baǵytta erik-jiger bolýy kerek. Sebebi ınnovatsııalar «dınozavrlar» júrgen jerge keledi. Atap aıtqanda, osy «dınozavrdy» alyp tastap, onyń ornyna ınnovatordyń kelýi - bul Úkimet aldynda turǵan qadam . Al osy kvazımemlekettik sektorlarda «dınozavrlar» otyr. Sondyqtan olardan tazartqannan keıin, maqsat-mindetter iske asyrylady degen oıdamyz»,-dep toqtaldy B. Saǵyntaev.
Sonymen qatar Úkimet basshysy iri kásiporyndarda damyǵan eldermen salystyrǵanda eńbek ónimdiligi tómen ekenin aıta kele, «Sonymen birge olardyń óniminiń satylmaı turǵanyn jaı ǵana baqylap tura almaımyz. Ónim satylýy úshin olarǵa kómek kórsetý kerek. Osydan kólikke jáne basqa baǵyttarǵa sýbsıdııalar bólinedi. Óz kezeginde osy jeńildikterge kásiporyndar da úırenip alady. Bul rette olar «memleketten surap alý múmkindigi bar kezde óz qaltamyzdan shyǵyndanyp qaıtemiz» degendi ádetke ala bastaıdy. «Mende 20 myń azamat jumys isteıdi. Ónim básekege qabiletti bolmaǵandyqtan, adamdardy qysqartýǵa májbúrmin» degen ýájdi alǵa tartady. Árıne, biz óz kezegimizde: «Adamdardy qysqartýshy bolma, biz saǵan kómektesemiz. Adamdar jumystaryn jalǵastyryp, jalaqysyn ala bersin» dep aıtamyz. Búginde biz qadamdarymyzdy ózgertýdemiz, 2025 jylǵa deıin olar tolyqtaı jańǵyrtý sharalaryn iske asyrýy tıis», - dedi Saǵyntaev.
