Saǵyntaev: Koronavırýs juqtyrǵan sımptomsyz naýqastar jazylǵansha úıde bolýy kerek
ALMATY. QazAqparat - Almaty qalasynyń ákimi Baqytjan Saǵyntaev koronovırýs ınfektsııasy bar sımptomsyz naýqastardy úıde otyrýǵa shaqyrdy, dep habarlaıdy QazAqparat tilshisi.
Baqytjan Saǵyntaev «Almaty» telearnasynyń tikeleı efırinde Ashyq qosymshasy kásipkerlik sýbektilerine jumys isteýge múmkindik beretinin atap ótti.
«Keıbir adamdar ózderiniń aýrý ekenin bile tura Ashyq boıynsha jumys isteıtin mekemelerge keledi. Onda olardyń «qyzyl» mártebesi shyǵady. Olar koronavırýstyń eshqandaı belgileri joqtyǵyn alǵa tartyp qoǵamdyq oryndarǵa barady. Muny jaýapsyzdyq dep aıtýǵa bolady. Men sımptomsyz aýyryp jatqan barlyq qalalyqtardan úıde bolýyn, emdelýin, sodan keıin ǵana shyǵýyn suraǵym keledi», - dedi qala ákimi.
Buǵan deıin, ol jappaı vaktsınalaý qalanyń qalypty ómirge oralýyna múmkindik beretinin aıtqan bolatyn.
https://www.kazinform.kz/kz/sagyntaev-zhappay-vakcinalanu-kalanyn-kalypty-omirge-oraluyna-mumkindik-beredi_a3789970
